Inspektorati Policor i Kosovës ka nisur hetimet ndaj një zyrtareje policore, e cila po dyshohet se ka kryer veprën penale “dhunë në familje”.
Burimet e Sinjalit brenda Prokurorisë kanë bërë me dije se zyrtarja policore (emër i njohur për redaksinë) që po dyshohet për dhunë në familje e ka gradën e rreshteres. E njëjta është denoncuar në Polici nga bashkëshorti i saj në orët e para të së martës.
Si rezultat i denoncimit, zyrtarja policore është intervistuar nga hetuesit e IPK-së, ku ka dhënë deklaratën e saj për rastin.
Rastin e kanë konfirmuar për Sinjalin edhe nga IPK dhe kanë njoftuar se janë ndërmarrë të gjitha veprimet e nevojshme hetimore lidhur me këtë rast.
“Duke ju referuar kërkesës suaj ju konfirmojmë se IPK është duke trajtuar këtë rast dhe të gjitha veprimet hetimore janë ndërmarrë në koordinim me Prokurorin e shtetit. Rasti është në fazën e hetimit paraprak”, thuhet në përgjigjen e IPK-së për Sinjali.
Në lidhje me këtë rast, Gazeta Sinjali ka dërguar pyetje edhe në Policinë e Kosovës, por të njëjtit ende s’kanë kthyer përgjigje.
Sinjali do të ju mbajë të informuar për veprimet ligjore ndaj zyrtares policore.
