Serbi: Aksidentohet politikani sanxhakas, i vdes shoferi

Kryetari i Partisë Socialdemokrate të Serbisë, Rasim Ljajiç, ka mbetur i plagosur rëndë në një aksident automobilistik ku humbi jetën shoferi i tij.

Kryetari i Partisë Socialdemokrate të Serbisë, Rasim Ljajiç, ka mbetur i plagosur rëndë mëngjesin e sotëm në një aksident trafiku ku ka humbur jetën shoferi i tij, kanë konfirmuar autoritetet serbe, transmeton Tanjug.

Në autostradën Beograd – Nish, afër Razanjit, rreth orës 09:00 të mëngjesit të sotëm, një “Skoda Superb”, në të cilën ndodhej kryetari i Partisë Socialdemokrate të Serbisë, Rasim Ljajiç, ka dalë nga rruga dhe për arsye të panjohura është përmbysur, tha Ministria e Brendshme në një deklaratë.

Në këtë aksident, drejtuesi i mjetit ka ndërruar jetë në vend nga plagët e marra.

Ndërsa Ljajiç ka pësuar lëndime në shkallë të pacaktuar dhe është transportuar në Qendrën Klinike në Nish.

Rasim Ljajiç është kryetar i Partisë Socialdemokrate të Serbisë dhe themelues i Partisë Demokratike të Sanxhakut.

Ai ka qenë njëherësh dhe ministër i Tregtisë në qeverinë serbe të viteve të fundit.