SHBA dërgon anije luftarake për të mbrojtur Emiratet e Bashkuara Arabe nga rebelët jemenas

Ushtria amerikane po dërgon një shkatërrues raketash dhe avionë luftarakë për të ndihmuar Emiratet e Bashkuara Arabe nga sulmet me raketa të nisura nga rebelët jemenas Houthi.

Vendimi për të ndihmuar Emiratet e Bashkuara Arabe kundër kërcënimit aktual, vjen pas një bisede telefonike midis Sekretarit të Mbrojtjes Lloyd Austin dhe Princit të Kurorës Mohammed bin Zayed Al-Nahyan.

Një deklaratë e Pentagonit tha se USS Cole do të bashkëpunojë me Marinën e Emirateve të Bashkuara Arabe.

“Sekretari gjithashtu informoi Princin e Kurorës për vendimin e tij për të vendosur avionë luftarakë të gjeneratës së 5-të për të ndihmuar Emiratet e Bashkuara Arabe kundër kërcënimit aktual dhe si një sinjal i qartë se Shtetet e Bashkuara qëndrojnë me Emiratet e Bashkuara Arabe si një partner strategjik afatgjatë”, thuhet në deklaratë.

Një sulm rebel i 17 janarit vrau tre punëtorë të huaj në një fabrikë nafte në Abu Dhabi, kurse një javë më vonë, forcat e Emirateve të Bashkuara Arabe dhe të SHBA-së në bazën ajrore Al Dhafra të Abu Dhabit, lëshuan raketa interceptuese për të shkatërruar dy raketa Houthi.

Sulmi i tretë erdhi të hënën, me raketat e Emirateve të Bashkuara Arabe që kapën një raketë Houthi gjatë një vizite të presidentit izraelit Isaac Herzog.

Emiratet e Bashkuara Arabe janë pjesë e koalicionit të udhëhequr nga Arabia Saudite, i cili që nga viti 2015 ka luftuar me rebelët Houthi në mbrojtje të qeverisë së njohur ndërkombëtarisht të Jemenit.