Shpërthime masive në Belgorod të Rusisë

Një seri shpërthimesh janë dëgjuar në qytetin rus të Belgorodit, pranë kufirit me Ukrainën, në orët e para të mëngjesit të së enjtes, teksa autoritetet po punojnë për shuarjen e zjarreve të mëdha të krijuara nga këto shpërthime.

Sipas guvernatorit rajonal, Vyacheslav Gladkov, zgjimi në Belgorod ishte “me shpërthime të mëdha të ndodhura rreth orës 03:30”.

Shkaqet mbi këto shpërthime ende nuk janë gjetur, ka vijuar më tej Gladkov në një postim në rrjetin Telegram.

Informacionet paraprake të mediave, sugjerojnë se një depo e madhe armatimesh është në flakë. Në zonat rezidenciale ndërkohë, nuk ka dëme të raportuara dhe nuk janë raportuar as humbje jetësh në rangun e civilëve.

Provinca e Belgorodit, është në kufi me rajonet ukrainase të Luhanskut, Sumyt dhe Kharkivit. Të tre këto vende, kanë parë luftime të ashpra mes forcave ruse dhe atyre ukrainase, në agresionin e Moskës ndaj Kievit.