Sot në mëngjes filluan reduktimet e rrymës: Krejt çfarë parasheh vendimi i Qeverisë për krizën energjetike

Kompania Kosovare për Distribuim me Energji Elektrike (KEDS) të dielën mbrëma njoftoi se se ka pranuar urdhëresë nga Operatori i Sistemit, Transmisionit dhe Tregut (KOSTT), që të fillojë me kufizimet e energjisë elektrike nga ora 08:00 e të hënës.

KEDS bëri të ditur se këto kufizime do të jenë deri në 2 orë për të gjithë konsumatorët, pra gjatë ditës së hënë reduktimet do të janë nga 6 orë me rrymë dhe 2 pa të.

Në këtë komunikatë për media KEDS fajëson qeverinë që nuk ka shpërndarë asnjë cent tek furnizuesit nga subvencionet e paralajmëruara nga qeveria në vlerë 100 milionë euro.

“Gjatë shqyrtimit të jashtëzakonshëm tarifor, rregullatori kishte marrë parasysh subvencionin e qeverisë prej 100 milionë eurosh. Asnjë cent nga ajo shumë nuk është shpërndarë tek furnizuesi”, thuhet në komunikatë.

Më 1 gusht Qeveria miratoi vendimin për shpalljen e masave emergjente për furnizim me energji

Por saktësisht para dy jave, në mbledhjen e saj të 91-të, Qeveria e Kosovës me propozim të Ministrisë së Ekonomisë, miratoi vendimin për shpalljen e masave emergjente për furnizim me energji, shkruan Reporteri.net.

Këto masa emergjente sipas Qeverisë janë marrë për shkak të rritjes së shpejtë të çmimit të importit të energjisë, si dhe “paralajmërimi i ndalimit të eksportit të lëndëve fosile nga disa shtete evropiane që mund të ndikojë në rritjen e mëtejshme të çmimit të importit”.

“Masat e marra do të mbesin në fuqi për 60 (gjashtëdhjetë) ditë pas aprovimit nga Kuvendi i Kosovës. Kuvendi mund të vazhdojë këtë afat për periudha të njëpasnjëshme prej 30 (tridhjetë) ditësh me shumicë të votave të deputetëve të Kuvendit të pranishëm në seancë, deri në 180 (njëqind e tetëdhjetë) ditë”, thuhet në njoftim.

Masa emergjente sipas Qeverisë përfshijnë:

“Masa mbështetëse për qytetarët me qëllim të sigurimit të ngrohjes gjatë dimrit;

Ndalimin e përdorimit të energjisë elektrike për mihjen e kriptovalutave;

Mbështetjen e Operatorit të Sistemit të Transmisionit dhe Tregut (KOSTT) për të ndërmarrë veprimet e nevojshme në funksion të ruajtjes së sigurisë së sistemit elektro-energjetik;

Masa në kursimin e konsumit të energjisë elektrike nga të gjitha institucionet”.

Qeveria në njoftimin e saj më 1 gusht kishte thënë se menaxnmenti i KEK-ut edhe pse me termocentrale të stërvjetruara, janë duke e bërë maksimumin që “blloqet e termocentraleve të gjenerojnë energji elektrike të mjaftueshme për të mbuluar kërkesën vendore”.

Ndërsa para 11 ditësh Kuvendi i Kosovës miratoi vendimin e Qeverisë për masat emergjente për furnizim me energji elektrike. Për vendimin votuan 61 deputetë, nuk pati asnjë votë kundër apo abstenim.

Kuvendi mund t’i zgjasë masat emergjente të miratuara deri në 180 ditë.