Supermarketet izraelite ndalojnë importet nga Turqia

Një grup zinxhirësh izraelitë supermarketesh po ndalojnë importet nga Turqia.

Lëvizja vjen pasi presidenti turk Recep Tayip Erdogan ka shprehur mbështetje për Hamasin duke përfshirë pretendimin se grupi nuk është një organizatë terroriste.

Ndërmarrjet përfshijnë zinxhirin më të madh të supermarketeve në Izrael, Shufersal, si dhe konkurrentët Rami Levy dhe Yochananof.

Edhe importuesit më të vegjël e kanë ndjekur shembullin.

Në vitet e fundit, Turqia është bërë një eksportues kryesor në Izrael.

Vitin e kaluar ajo u rendit në vendin e pestë pas Kinës, Shteteve të Bashkuara të Amerikës, Zvicrës dhe Gjermanisë.

Në vitin 2022, importet nga Turqia arritën në 7 miliardë dollarë – rritje dyshifrore çdo vit që nga viti 2019, kur numri arriti në 4 miliardë dollarë.

Rritja është produkt i marrëveshjeve dhe takimeve ekonomike, si vizita dhjetorin e kaluar me iniciativën e Federatës së Dhomave të Tregtisë të Izraelit dhe Asamblesë së Eksportuesve Turke.

Importuesit izraelitë u takuan me biznesmenë vendas në Stamboll.

“Ne kemi krijuar një delegacion të krijuar për të devijuar disa nga importet tona nga vende të tjera tek ata, nga të kuptuarit se ata janë më afër nesh se Evropa dhe se kanë industri të ndryshme”, ka thënë Uriel Lynn, presidenti i federatës.

Sipas Lynn, situata aktuale është një “shok total” dhe mund të dëmtojë ndjeshëm importet në Izrael.

“Ne jemi njerëz realistë dhe është e qartë se shumë importues do të jenë të kujdesshëm për të blerë në Turqi”, ka vijuar ai.

“Ne nuk e dimë ende se si sulmi nga Erdogan do të ndikojë në biznes, kështu që është e vështirë të vlerësohet se sa nga kjo do të ndalet. Për ne është një zhgënjim shumë i hidhur”, ka shtuar ai.