Në objektin e Qeverisë së Kosovës, ministri i Drejtësisë së Danimarkës, Nick Haekkerup, ka mbajtur konferencë para mediave së bashku me ministren e Drejtësisë së Kosovës, Albulena Haxhiu, ku është nënshkruar një letër-qëllim sipas të cilit, 300 qeli burgu të Kosovës do t’i jepen në shfrytëzim shtetit të Danimarkës.
Haekkerup e ka falënderuar Kosovën për dhënien me qira të qelive ku do të vendosen të burgosur nga ky shtet.
“Kemi kërkuar ndihmë nga disa vende për ta zgjidhur këtë problem, por Kosova ka qenë vendi i parë që ka reaguar pozitivisht ndaj kërkesës tonë dhe është angazhuar pozitivisht më pas në dialog për këtë çështje”, tha ai.
Hakkerup ka thënë se qendrat e paraburgimit do të menaxhohen sipas ligjeve të Danimarkës.
“Është vizita e parë në Kosove, mezi pres të vazhdojmë bashkëpunimin. Sapo nënshkruam një letër që e shohim gurthemel për marrëveshje të ardhshme. Kjo marrëveshje do të zgjidh problemin me burgjet në Danimarkë”, ka thënë Haekkerup.
“Menaxhimi do të jetë nën lidershipin e autoriteteve të Danimarkës, por do të ketë trajnim edhe për stafin vendas. Danimarka do të respektojë të gjitha ligjet sa i përket sistemimit dhe trajtimit të burgosurve”, tha ndër të tjera Hakkerup.
Për këtë huazim, sipas letër-pëlqimit, Kosova pritet të përfitojë 210 milionë euro në dekadën e ardhshme.
Ndërsa për implemintimin e kësaj marrëveshje do të duhet të ratifikohet në Kuvendin e Kosovës me dy të tretat e votave.
