Tërmeti në Turqi dhe Siri, mbi 2700 viktima

Numri i viktimave në Turqi dhe Siri, pas dy tërmeteve brenda disa orësh nga njëri-tjetri, mund të vazhdojë të rritet ndjeshëm, sipas Organizatës Botërore të Shëndetësisë (OBSH).

Më shumë se 2 700 njerëz thuhet se kanë vdekur në të dy vendet, me shifrën që vazhdon të rritet, ndërkohë që vijojnë operacionet e vazhdueshme të kërkim-shpëtimit.

“Ekziston mundësia e shembjeve të mëtejshme të ndërtesave, kështu që ne parashikojmë rritje me 8-fish, krahasuar me numrat fillestarë,” i tha agjencisë së lajmeve AFP oficerja e lartë e urgjencës e OBSH-së për Evropën, Catherine Smallwood.

“Gjithmonë shohim të njëjtën gjë me tërmetet, për fat të keq. Raportimet fillestare të numrit të personave që kanë vdekur ose që janë plagosur do të rriten mjaft ndjeshëm në javën në vijim”, shtoi Smallwood.

Që kur tërmeti fillestar me magnitudë 7,8 goditi Turqinë jugore, afër kufirit verior të Sirisë, në orën 04:17 me orën lokale, numri është rritur me shpejtësi, ndërsa ekipet e shpëtimit luftojnë për të gjetur të mbijetuarit e bllokuar nën rrënojat e mijëra ndërtesave të shembura.