Trump paralajmëron Iranin për minat në Gjirin e Hormuzit:“Pasojat ushtarake do të jenë historike”

Presidenti amerikan Donald Trump publikoi një mesazh në Truth Social pas raportimeve se Irani po vendos mina në Ngushticën e Hormuzit.

Trump shkruante se, nëse Irani ka vendosur mina, për të cilat deri tani nuk ka raporte të konfirmuara, ato duhet të hiqen menjëherë. Ai paralajmëroi se nëse minat nuk hiqen, pasojat ushtarake ndaj Iranit do të jenë “në një nivel të paprecedent”.

Nga ana tjetër, presidenti shtoi se heqja e mundshme e minave do të përbënte një “hap gjigant në drejtimin e duhur”.

Më herët sekretarja për Shtyp e Donald Trump, Karoline Leavitt, deklaroi se presidenti është i përkushtuar për të garantuar rrjedhjen e lirë të naftës përmes Ngushticës së Hormuzit, duke rikujtuar se ai ka ofruar që marina amerikane të “eskortojë tankerët kur të jetë e nevojshme”.

“Ushtarakët amerikanë po përgatisin opsione të reja pas udhëzimit të presidentit për të vazhduar mbajtjen e Gjirit të Hormuzit të hapur”, tha Leavitt.

Ajo shtoi se nuk do të zbulojë detajet e opsioneve, por se presidenti nuk ka frikë t’i përdorë ato nëse nevojitet.