Trumpi nuk tërhiqet për Groenlandën: Besoj se do ta marrim

Presidenti amerikan Donald Trump duket i vendosur për të arritur qëllimin e tij që Groenlanda të jetë nën administrimin e SHBA-së.

Së fundmi ai ka shprehur besimin se SHBA do ta marrë kontrollin e Groenlandës.

“Unë mendoj se do t’ia arrijmë. 57 mijë banorët e ishullit duan të jenë me ne”, u tha Trump gazetarëve të shtunën në avionin Air Force One gjatë fluturimit.

Donald Trump kërkon që SHBA të blejë Groenlandën. Këtë skenar ai e shfaqi që në mandatin e tij të parë si President, dhe e ka risjellë sërish tani, pasi siç shprehet ai, është çështje e sigurisë kombëtare për Amerikën.

Pak ditë më parë ai pati një bisedë telefonike të tensionuar me Kryeministren e Danimarkës, e cila i tha se Groenlanda nuk është në shitje.

Ishulli është pjesë e Mbretërisë së Danimarkës, por vetëqeveriset.

“Nuk e di çfarë pretendimi ka Danimarka, por do të ishte akt shumë armiqësor nëse nuk do ta lejojë që të ndodhë sepse bëhet fjalë për mbrojtjen e botës së lirë. Unë mendoj se do ta marrim Groenlandën sepse ka të bëjë me lirinë e botës. Ne jemi ata që mund të sigurojmë lirinë, ata nuk munden”, u shpreh Presidenti Trump.

Si liderët e Groenlandës, ashtu dhe ata të Danimarkës, kanë kundërshtuar blerjen e ishullit nga SHBA.