Turqia Dhuron Pajisje Në Vlerën 1.5 Milion Dollarë Për Emergjencat Civile

Qeveria turke ka dhuruar pajisje dhe uniforma për strukturat e Emergjencës Civile Shqiptare, pajisje që kapin vlerën e 1.5 milion dollarëve.

Gjatë ceremonisë së prezantimit të uniformave dhe automjeteve të reja të strukturave të Emergjencës Civile ishte edhe ministrja e Mbrojtjes, Olta Xhaçka, e cila vlerësoi bashkëpunimin me aleatin e NATO-s, Turqinë, në kuadrin e emergjencave civile.

Referuar investimeve të viteve të fundit në Forcat e Armatosura, Ministrja Xhaçka theksoi edhe vëmendjen që i është kushtuar modernizimit dhe riorganizimit të strukturave të Emergjencave Civile.

“Ne të gjithë jemi dëshmitarë se sa janë rritur sfidat e fatkeqësive natyrore. Ligji i ri për mbrojtjen civile vendos theksin në parandalimin e katastrofës dhe ndan përgjegjësi të qarta për qeverisjen vendore, siç është caktimi i 4% të buxheteve vjetore të komunave për emergjencat, dhe mbi të gjitha krijoi Agjencinë Kombëtare të Mbrojtjes Civile.

Pra, nga drejtoria me 7 persona, kemi sot një Agjenci me 120 persona që menaxhon koordinimin dhe trainimin e strukturave të specializuara për emergjencat civile ”, tha Ministria Xhaçka.

Ndërsa Ambasadori i Turqisë në Shqipëri, Murat Ahmet Yoruk, vlerësoi marrëdhëniet midis dy popujve.