Turqinë po e mban ‘gjallë’… Putini!

Një përçarje e re po shfaqet midis Ankarasë dhe Uashingtonit për shkak të bashkëpunimit gjithnjë e më të madh të Turqisë me Rusinë në sektorin e energjisë dhe ekonomisë.

Ky burim i ri i konfliktit vjen në një kohë kur Ankaraja është goditur nga sanksione dhe është përjashtuar nga programi i bashkëprodhimit të F-35 për shkak të blerjes së S-400 ruse, shkruan gazeta Kathimerini.

Sipas presidentit Rexhep Tajip Erdogan, Turqia do të shërbejë si “qendër energjetike” e Rusisë për gazin natyror dhe Ankaraja do të jetë në gjendje të furnizojë me gaz Evropën.

Për më tepër, kompania ruse e energjisë bërthamore Rosatom njoftoi se kanë filluar konsultimet me zyrtarët turq për ndërtimin e një termocentrali të dytë bërthamor në Sinop në Detin e Zi.

Rritja e shpejtë e eksporteve të Turqisë në Rusi, si dhe raportet për krijimin e firmave ruse të cilësuara si “fronte” në Turqi, kanë shkaktuar gjithashtu reagime në Uashington.Me sa duket, numri i kompanive ruse të krijuara në tetë muajt e parë të këtij viti ishte 729 krahasuar me rreth 100 në vitet e mëparshme.

SHBA e ka bërë të qartë kundërshtimin e saj ndaj planeve të bëra nga Rusia dhe Turqia, me zëvendës zëdhënësin kryesor të Departamentit të Shtetit, Vedant Patel, që iu kërkoi aleatëve të ndërmarrin hapa për të diversifikuar burimet e tyre të energjisë dhe për të reduktuar varësinë nga Rusia.

Në rastin e Turqisë në veçanti, ai tha se SHBA po punon ngushtë me Ankaranë për të rritur sigurinë e saj afatgjatë të energjisë.

Ai shtoi se Uashingtoni i ka shpjeguar Turqisë dhe të gjithë aleatëve dhe partnerëve të saj se askush nuk duhet të kthehet në një strehë të sigurt për asetet ose transaksionet e paligjshme ruse.

Analistët turq vërejnë se varësia e Turqisë nga Rusia po rritet vazhdimisht në sektorin e energjisë, ndërsa theksojnë se “dhuruesi i gjakut” më i rëndësishëm i ekonomisë turke për momentin është Vladimir Putin.

Përveç transaksioneve paralele që anashkalojnë sanksionet, analistët vënë në dukje se Moska po dërgon remitanca prej miliarda dollarësh në Turqi për ndërtimin e termocentralit bërthamor Akkuyu, ndërsa shumica e rusëve udhëtojnë në vendet perëndimore përmes Turqisë.

Ndërkohë, në një intervistë për gazetat Hurriyet dhe Sozcu, ministri turk i Mbrojtjes Hulusi Akar theksoi nevojën për dialog me Greqinë, duke përsëritur thirrjen për çmilitarizimin e ishujve.

Ai tha gjithashtu se ka ftuar ministrin e Mbrojtjes Nikos Panagiotopulos dhe gruan e tij në Turqi. Athina vuri në dukje se nuk është koha për një vizitë në këtë fazë.