“U foli mureve në sallën pothuajse bosh të OKB”, media serbe përqesh presidentin Vuçiç

“Fjalimi i Vuçiçit në OKB bëri jehonë në kuptimin e parë të fjalës, pra vetëm në muret e një salle gjysmë bosh”. Me këto nota tallëse, media Nova e Beogradit ka komentuar adresimin e presidentit të Serbisë në Asamblenë e Përgjithshme të Kombeve të Bashkuara.

Raportohen disa nga pjesët kryesore të fjalimit të tij, natyrisht me nuanca përqeshje dhe ironie, veçanërisht kur citoi Mahatma Gandin dhe lojërat e fjalëve me paqen.

“Mirëpo, pakkush pati mundësinë t’i dëgjonte drejtpërdrejt këto fjalë të forta të presidentit”, vijon komentin Nova.

Media në fjalë shton se “në momentin kur presidenti i Serbisë ka folur në foltore, salla e Asamblesë së Përgjithshme ishte pothuajse bosh”. “Jo shumë përfaqësues të vendeve të botës patën rastin ta dëgjonin këtë fjalim, “aq të fuqishëm”, vijon komentin tallës gazeta serbe.