U takua me Vuçiç, rrëfehet kreu i bandës serbe: Kam marrë urdhra nga zyrtarë të lartë të shtetit

Veljko Belivuk, i njohur si ” Velja Nevolja” (“Velja Telashi”), udhëheqës i Janjicarëve, (Jeniçerëve) një grup i ashtuquajtur tifozësh futbolli, i tha Gjykatës së Lartë të Beogradit se grupi që ai drejtonte i kishte “shërbyer nevojave të Shtetit”.

“Me Aleksandar Stankoviç [i vrarë në vitin 2016], unë drejtova një grup që u shërbeu nevojave të shtetit deri në vrasjen e tij, pas së cilës vazhdova ta bëja këtë”, tha Belivuk në gjykatë në ditën e parë të gjyqit kundër tij dhe 29 të tjerëve.

Ata akuzohen për vepra të shumta kriminale, duke përfshirë vrasje të rëndë, rrëmbim, mbajtje pa leje të armëve dhe lëndëve plasëse dhe trafik droge.

Ai tha se grupi i tij mori detyra nga zyrtarë të lartë shtetërorë nëpërmjet një tifozi të futbollit, Aleksandar Vidojevic. Ai një herë ka takuar personalisht Presidentin e Serbisë, Aleksandar Vuçiç, i cili sugjeroi që komunikimi i mëtejshëm duhet të vazhdojë përmes ministrit të Brendshëm Aleksandar Vulin.

BIRN i kërkoi Ministrisë së Brendshme një koment nga ministri Vulin, por ajo nuk u përgjigj në momentin e publikimit.

Kjo ishte një përsëritje e një deklarate që Belivuk dhe bashkëpunëtori i tij Marko Miljkovic kishin dhënë në vitin 2021, gjatë hetimit të tyre. Pasi mediat në Serbi i publikuan ato, Vuçiç njoftoi se ai dhe Vulin “do të gjenin një nga kolegët që ta bënte atë [të sjellë një çështje penale] për të paraqitur gjithçka që thanë ata njerëz”.

Disa ditë më vonë, kryebashkiaku i qytetit verior të Novi Sadit, Milos Vucevic, një zyrtar i lartë në Partinë Progresive Serbe në pushtet të Vuçiqit, SNS, ngriti një kallëzim penal kundër Vuçiçit – me qëllim të pastrimit të emrit të Presidentit dhe ekspozimit të “oktapodit mafioz “ që kryetari tha se e kishte Vuçiçin në sy.

Vulin më vonë tha për televizionin Pink se Belivuk ishte “në prag të burgimit të përjetshëm dhe po gënjen sepse nuk ka asgjë për të humbur”, duke shtuar se ai “po përpiqej të shantazhonte Presidentin e Serbisë, Aleksandar Vuçiq, dhe të gjithë ata që janë të përfshirë në luftën kundër mafies”.

Belivuk u arrestua në shkurt 2021 së bashku me anëtarë të tjerë të bandës.

Janjicari, (Jeniçerët), që më vonë u quajt “Principi”, u formua në vitin 2013. Ajo zhvilloi lidhje me kontraktorët privatë të sigurisë, por edhe me zyrtarë shtetërorë, duke përfshirë një këshilltar të lartë të policisë dhe sekretarin e përgjithshëm të qeverisë serbe.

Një hetim i BIRN 2019 vërtetoi lidhje të ngushta midis grupit të tifozëve të futbollit dhe shtetit. Belivuk tha gjithashtu se grupi i tij mori pjesë në prishjet e diskutueshme gjatë natës në lagjen Savamala të kryeqytetit në vitin 2016 , gjë që hapi rrugën për projektin e përbashkët të pasurive të paluajtshme Emiratet e Bashkuara Arabe-Serbi, Ujorin e Beogradit.

Natën mes 24 dhe 25 prillit 2016, persona të maskuar me shkop bejsbolli dhe të pajisur me fadroma rrënuan ndërtesat në rrugën Hercegovacka të Beogradit, kur vëmendja e publikut pushtoi numërimin e votave nga zgjedhjet parlamentare të një dite më parë.