E bija e teoricienit dhe këshilltarit më të ngushtë të presidentit rus Vladimir Putin, ka humbur jetën mbrëmjen e së shtunës në periferi të Moskës.
Sipas raportimeve vajza e aleatit të ngushtë të Putinit ndërroi jetë, kur makina me të cilën po udhëtonte teksa po shkonte në shtëpi shpërtheu në flakë.
Ndërsa mendohet se objektiv i sulmit terrorist të ketë qenë babai i viktimës, pasi atë makinë e përdorte ai dhe jo vajza, megjithatë këto janë pretendime të paverifikuara.
Fill pas atentatit, në vendin e ngjarjes mbërriti vetë Dugin duke vënë duart në kokë nisur nga ajo që pa, shkruan BBC.
Dugin është një ideolog i shquar ultra-nacionalist që besohet të jetë i afërt me presidentin rus. Alexander Dugin u sanksionua nga SHBA në 2015 për përfshirjen e tij të dyshuar në aneksimin rus të Krimesë.
Shkrimet e tij vlerësohen se kanë një ndikim të thellë në botëkuptimin e Vladimir Putinit dhe ai konsiderohet të jetë arkitekti kryesor intelektual i ideologjisë ultra-nacionaliste të cilës i përmbahen shumë në Kremlin.
Vajza e tij Darya Dugina, ishte gazetare e njohur në Rusi, që mbështeti me zë pushtimin rus të Ukrainës.
Në maj, ajo e përshkroi luftën si një “përplasje qytetërimesh” në një intervistë dhe shprehu krenarinë për faktin se ajo dhe babai i saj ishin sanksionuar nga Perëndimi.
Edhe pse ende nuk ka informacion se kush mund ta ketë vendosur eksplozivin në makinë, kreu i DPR në Donetsk, Denis Pushilin, fajësoi “terroristët” ukrainas për shpërthimin.
“Terroristët e regjimit ukrainas tentuan të vrasin Aleksandër Dugin dhe vranë vajzën e tij në një makinë”, shkroi ai në Telegram.
Megjithatë deri më tani nuk ka asnjë koment zyrtar nga autoritetet ruse në lidhje me ngjarjen.
