“Ukraina ka mjaftueshëm raketa për të fundosur të gjithë flotën ruse në Detin e Zi”

Raketat e marra nga Ukraina janë tashmë të mjaftueshme për të fundosur të gjithë Flotën e Federatës Ruse në Detin e Zi.

Lajmi u njoftua nga mediat vendase, duke cituar kryetarin e Administratës Ushtarake të Odessa-s, Sergei Bratchuk.

Bratchuk vuri në dukje se, sipas ekspertëve amerikanë, pesë raketa anti-anije Harpoon do të nevojiteshin për të çaktivizuar një aeroplanmbajtëse.

Katër duhen për të shkatërruar një kryqëzor dhe dy për të shkatërruar një anije “destroyer”.

Një raketë është në gjendje të shkaktojë dëme serioze kur godet një anije ose varkë të vogël.

Për shembull, dy anije iraniane u fundosën nga raketat “Harpoon” në Gjirin Persik.

“Tani kemi marrë aq shumë Harpoon sa mund të fundosim të gjithë flotën ruse të Detit të Zi. Pse jo?”, komentoi Bratchuk.

Ushtaraku ukrainas përshkroi se si funksionojnë raketat “Harpoon”.

Pas përfundimit të lëshimit, raketa zbret në një lartësi prej 15 metrash mbi nivelin e detit dhe më pas kryen një fluturim marshimi. Pastaj bie në 2 metra dhe godet objektivin.

Forcat e Armatosura të Ukrainës kanë kryer më parë një sërë operacionesh të suksesshme detare, duke shkatërruar, në veçanti, anijen flamurtare të Federatës Ruse “Moskva”.