Ushtari amerikan me emblemë të UÇK’së në krah, po stërviste ushtarët e FSK’së

Ekipi i ushtrisë së Shteteve të Bashkuara të Amerikës, që ka ardhur në Kosovë me mision për mbajtjen e trajnimeve ushtarake, ka qëndruar sot në kampin e Cërrnushës, për t’i parë nga afër stërvitjet e pjesëtarëve të Forcës së Sigurisë së Kosovës.

Aty u improvizuan aksione që mund të përdoren në kohë lufte, për shpëtimin e dikujt apo vënien nën kontroll të një hapësire të caktuar, njofton Klan Kosova.

Pjesëtarët e ushtrisë më të fortë në botë janë në Kosovë me qëllim të trajnimit të një pjese të FSK-së dhe Policisë.

Shumica prej tyre, përveç flamurit të SHBA-së, mbanin në krah edhe atë të Kosovës. Por njëri ka të vendosur diçka edhe më të veçantë, emblemën e Ushtrisë Çlirimtare të Kosovës.

Ky ekip ushtarakësh vjen në Kosovë si rezultat i marrëdhënieve bilaterale mes dy vendeve dhe ndihmës që shteti amerikan e ofron në aspektin e sigurisë.

Një ditë më parë, i njëjti delegacion amerikan kreu trajnime me njësitin elitar të policisë.