VIDEO/ “Asfalti shkërmoqet me këmbë”, banorët e Postribës protestojnë për rrugën

Banorët e Postribës në Shkodër protestojnë për rrugën. Rikonstruksioni i saj ka nisur, por siç shprehen banorët punimet nuk po kryhen siç duhet. Bëhet fjalë për rrugën që lidh dy fshatrat Mes dhe Kullaj. Ata kërkojnë që Bashkia të mos marrë në dorëzim këtë aks rrugor që po shfaq probleme që në fillim të punimeve.

Rruga prej 3 kilometrash që do lidhë banorët e fshatrave Mes dhe Kullaj në njësinë Administrative Postrribë të Shkodrës, që në 400 metrat e parë të projektit ka shfaqur problematika.

Gazetari Simon Shkreli raporton për Abc Neës se për shkak të cilësisë së punimeve dhe mosrespektimit të projektit banorët kanë dalë në protestë. Shtresa e asfaltit të ri mbi asfaltin e vjetër nuk është më e trashë se dy cm .

“Këta dun veç me marr paret. Shihni si hapet asfalti me këmbë”, shprehet një banor. Ndërsa një tjeter shprehet se “ka qenë më e mirë rruga e bërë 15 vjet më parë”.

Banorët kërkojnë që Bashkia mos ta marrë në dorëzim rrugën deri sa të bëhet në parametrat e duhur. Investimi kap shifren e 10 milion lekëve të reja dhe po kryhet me fondet e Bashkisë së Shkodër.