Vuçiç-it po i mungon Merkel, me Scholz-in s’ka arritur të njëjtin nivel miqësie

Raporti i mirë në mes të presidentit serb, Aleksandër Vuçiç dhe ish-kancelares gjermane, Angela Merkel, nuk është përcjellur me ndërrimin e pushtetit në gjermani dhe ardhjen e Olaf Scholz.

Kohëve të fundit ka pasur shumë deklarata edhe nga vetë Vuçiç, por edhe nga kryeministrja serbe, Ana Brnabiç dhe krye-diplomati serb Ivica Daçiç, kundrejt qasjes së Gjermanisë dhe pakënaqësisë së tyre me Scholz e ministren e jashtme gjermane Annalena Baerbock.

Madje, me 5 maj Vuçiç u takua me shefen e diplomacisë gjermane Baerbock, me të cilën bisedoi për pozicionin ndërkombëtar të Serbisë dhe takimi u raportua si “mjaft i pakëndshëm”, pasi gjermanja këmbënguli që Serbia të merrte një vendim të qartë në raport me sanksionet kundrejt Rusisë.

Mediumi serb Nova në një interviste me të dërguarin gjerman për Ballkanin, Manuel Sarrazin, ka trajtuar pos tjerash edhe këtë ndryshim raportesh.

Megjithatë, ai tha se “kjo nuk është e vërtetë”. “Gjermania ka pasur gjithmonë të njëjtën qasje ndaj Serbisë”.

Por, thekson se “ka të ngjarë që të ketë një qasje të ndryshme kur bëhet fjalë për marrëdhëniet ndërmjet palëve, pasi ne e dimë se CDU është pjesë e së njëjtës familje partish si SNS, ashtu siç dimë që partitë aktualisht në pushtet në Gjermani nuk janë. Kjo është normale dhe nuk ka të bëjë vetëm me Serbinë”, deklaroi Sarrazin.

“Nëse e shikoni pamjen më të gjerë, do të shihni se Gjermania është investitori më i madh dhe – jam i bindur – investitori më i mirë në Serbi dhe se gjithmonë mund t’i besoni Gjermanisë”.

“Kur lidhemi me një shtet ne qëndrojmë të lidhur dhe jemi në anën tuaj. Por, sigurisht që jemi të sinqertë edhe kur flasim për dallimet tona dhe e dimë që ndonjëherë nuk është e lehtë”, pohoi ai.