Vuçiq: S’ka dialog nëse Prishtina vjen në tryezë për të kërkuar njohjen dhe kërkim faljen

Krijimi i Qeverisë së re të Republikës së Kosovës që do të drejtohet nga Albin Kurti tashmë ka rikthyer në masë të madhe diskutimet rreth rinisjes së dialogut Prishtinë-Beograd.

Normalizimin e raporteve e ka kërkuar edhe kreu i SHBA’së, Donald Trump, ndërkohë Vladimir Putin ka thënë se dy palët duhet të gjejnë një zgjidhje të qëndrueshme dhe të pranueshme mbështetur në Rezolutën 1244.

Megjithatë presidenti i Serbisë, Aleksander Vucic, thotë se nuk mund të ketë bisedime në rast se Kosova kërkon njohjen e pavarësisë dhe kërkim faljen e Serbisë për krimet e kryera gjatë luftës së fundit.

Sipas tij nëse Prishtina zyrtare nuk dëshiron të flasë për gjëra substanciale atëherë s’ka as dialog.

“Por, përsëri shpresoj se do të ketë njerëz më të arsyeshëm, racional e të cilët e kuptojnë se sa është e rëndësishme të flasim dhe të përpiqemi të gjejmë një kompromis. Dhe nëse nuk dëshirojnë, nesë mendojnë se mund ta mposhtin Serbinë me shantazhe, gabohen”, ka thënë Aleksander Vucic.

Tutje kreu i shtetit serb ka komentuar edhe propozimin e kryeministri të Kosovës, Albin Kurti, për shërbim të detyruar ushtarak. Sipas tij derisa Kurti ka folur për një gjë të tillë askush s’ka reaguar.

Sipas tij kjo është edhe një arsye pse shteti serb duhet të jetë i zgjuar.

Vuçiq është pyetur edhe rreth deklaratave të Azem Vllasit, se në tryezën e dialogut me Serbinë janë 4 çështje të cilat nuk duhet të diskutohen.

“Integriteti territorial, kufijtë e vendosur, sistemi i brendshëm dhe rendi kushtetues janë katër pika që e përbëjnë shtetin dhe nuk duhet të diskutohen me Serbinë në procesin e dialogut”, kishte deklaruar Vllasi.

Kësaj deklarate të Vllasit, Vuçiq i është përgjigjur me ironi duke thënë se nuk është i interesuar të flasë për frizurën e Azem Vllasit dhe se nuk është i fascinuar as me frizurën e Albin Kurtit.