Vuçiqi bëhet dramatik: Po më pikojnë lotët kur shoh serbët që presin para bankomateve

Presidenti i Serbisë, Aleksandar Vuçiq, është deklaruar pas Samitit Ukrainë-Evropë Juglindore që u mbajt në Tiranë. Ai në një pjesë ka folur për vendimin e Bankës Qendrore të Kosovës për ndalim të përdorimit të dinarit serb si mjet pagese.

Sipas tij, ky vendim është “përpjekje e Kryeministrit të Kosovës, Albin Kurti për t’i përzënë serbët”.

“S’ka rëndësi se çfarë ndodh, ne do të sigurojmë para për njerëzit tanë. Për ta definuar me nja fjali – Albin Kurti dëshiron t’i dëbojë serbët nga Kosova”, është shprehur Vuçiqi.

“Më pikojnë lotët kur shoh njerëzit tanë kur shoh tek presin para bankomateve. Ne mund t’u japim tri herë më shumë sesa që u japim normalisht. Ka teknikalitete të një burri të papërgjegjshëm i cili dëshiron dëbimin e njerëzve, i cili dëshiron të bëhet legjendë duke shkatërruar një komb të tërë”, u shpreh Vuçiqi shumë dramatik.

Vuçiq ka shtuar se ata do të dërgojnë para dhe do të marrin vendime për t’i ndihmuar serbët në Kosovë.