Kryetari i Komunës së Vushtrrisë Xhafer Tahiri në një rrëfim “pa maskë”,ka shpalosur edhe momente nga e kaluara e tij si medresant.
Madje, edhe pas përfundimit të studimeve të doktoratës në fushën e drejtësisë, ai ka deklaruar se prindërit e tij më shumë do të ishin gëzuar nëse ai do të bëhej hoxhë sesa ta ndiqte rrugëtimin e tanishëm, veçanërisht babi i tij i ndjerë.
Tahiri ka folur për projektet e realizuara gjatë mandatit të tij si i pari i kësaj komune.
Një prej projekteve të veçuara ka ishte edhe kyçja në rrjetin e ujësjellësit të rreth 9 mijë familjeve të kësaj komune të cilat nuk kanë pasur ujë të pijes nga ujësjellësi.
Ai ka thënë se ky projekt ka qenë sfidues, mirëpo është shprehur i bindur se do të përfundojë me sukses.
Gjatë periudhës së tij si kryetar i Vushtrrisë, Xhafer Tahiri ka përmendur edhe zonën ekonomike që, sipas tij, do t’iu ndihmojë qytetarëve veçanërisht në këtë vit të pandemisë, ndërtimin e çerdheve dhe shkollave, po ashtu ka paralajmëruar edhe hapjen e shtëpisë së kulturës ku do të përfshihet edhe teatri i qytetit.
Mirëpo, një prej projekteve për të cilin ka folur më në detaje në publik është edhe planifikimi i ndërtimit të një xhamie me arkitekturë moderne në Vushtrri.
“Ka qenë një kërkesë e këshillit të Bashkësisë Islame në Vushtrri për të caktuar një lokacion për të ndërtuar një xhami moderne në Vushtrri. Unë me kënaqësi e kam pranuar këtë kërkesë dhe bashkë po hulumtojmë lokacionet për të caktuar një vend për ndërtimin e një xhamie e cila do të jetë moderne, e shekullit XXI… që t’i transmetohet gjeneratave të ardhshme arkitektura e tanishme”, ka deklaruar Tahiri, i cili ka thënë se tashmë është përzgjedhur projekti i një arkitekti shqiptar nga ana e Bashkësisë Islame. Sipas tij, kjo xhami do të ndërtohet me financim vullnetar dhe ideja është që të mos merren fonde jashtë Kosovës.
I pyetur nëse do të garojë për një mandat të dytë, ai është shprehur se ende nuk ka vendosur për një hap të tillë.
