Zbardhet motivi i dorëheqjes/ Tufa: ‘Qentë e diktaturës’ i janë afruar shumë familjes sime… e di kush më ka kërcënuar

Në një letër 5 faqësh, Agron Tufa ka dhënë motivet e dorëheqjes së tij nga posti drejtorit ekzekutiv të Institutit për Studimin e Krimeve dhe pasojave të Komunizmit në Shqipëri.

Tashmë në Zvicër, Tufa shkruan se ka kërkuar azil politik, pas ka marrë kërcënime të vazhdueshme për jetën. Madje, ai shkuan se në dy herë brenda muajit nëntor, këta persona për të cilin shprehet se e di se kush janë dhe çfarë janë të aftë të bëjnë, i kanë kërcënuar dhe familjen e tij.

“Dy herët e fundit, brenda muajit nëntor, qentë e liruar nga zinxhirët e diktaturës së vjetër në diktaturën e re iu afruan shumë familjes sime. Kush do më mbronte mua dhe fëmijët e mi? Unë pata kohën e mjaftueshme për të kuptuar kush janë ata dhe çfarë janë në gjendje të bërë. Mjafton e kaluara e tyre. Qëndrimi im i mëtejshëm në punën time, në atdheun tim dhe të fëmijëve të mi, në të drejtën time do të ishte i palogjikshëm, përderisa do të kishte, siç jam i bindur , një çmim tragjik kurrë më të kthyeshëm. Dhe kjo nuk do të gjente më kurrë as përgjigje njerëzore dhe as hyjnore. Misioni im do të vazhdojë në kushte jo më pak të efektshme se ato që pata kënaqësinë dhe krenarinë të kem brenda ISKK. Jam i sigurt se kolegët e mi janë po aq të aftë (në mos më të aftë) ta shtyjnë përpara misionin e zbardhjes së Krimeve të Komunizmit, ashtu siç kanë tashmë përvojën, qartësinë dhe përkushtimin nën drejtimin dhe sugjerimet tuaja”, thuhet ndër të tjera në letrën e dorëheqjen.

Dorëheqja i është dërguar kreut të Bordit, ISKK, Uran Butka, teksa ka vënë në dijeni presidentit Ilir Meta, kryetarit të Kuvendit Gramoz Ruçi dhe kryeprokurores së Përkohshme, Arta Marku. Tufa ka denoncuar prej kohësh se po kërcënohet nga disa persona pasi sipas tij ka një dosje ku janë të përfshirë emra që sot kanë poste drejtuese dhe në të kaluarën kanë kryer krime, kanë persekutuar dhe plaçkitur.