Zelensky: Marrëdhëniet me SHBA-në do t’i shpëtojë por nuk do t’i lëshojë Rusisë asnjë territor

Volodymyr Zelensky i Ukrainës ka deklaruar se beson se mund ta shpëtojë marrëdhënien e tij me presidentin e SHBA-së, Donald Trump pas takimit të tyre me tension në Zyrën Ovale, por se bisedimet duhej të vazhdonin me dyer të mbyllura.

Zelensky përsëriti se Ukraina nuk do t’i lëshojë asnjë territor Rusisë si pjesë e një marrëveshjeje paqeje.

Ai tha se ishte ende i gatshëm të nënshkruante një marrëveshje për mineralet me SHBA-në dhe përshkroi një diskutim me liderët evropianë për të dërguar një plan paqeje në SHBA si një zhvillim kyç.

Në një takim të jashtëzakonshëm që u transmetua drejtpërdrejt të premten, Trump akuzoi Zelenskyn për mosmirënjohje për ndihmën e SHBA-së, për shfaqjen e mungesës së respektit ndaj vendit të tij dhe se po luan me një Luftë të Tretë Botërore, duke vënë në dyshim mbështetjen e vazhdueshme të Uashingtonit për Ukrainën në luftën e saj trevjeçare me Rusinë.

Bëhet e ditur se Zelensky foli me gazetarët në një aeroport të Londrës pas samitit me liderët evropianë në Londër, shkruan Reuters.

Ndërsa dukej në humor të mirë dhe falënderoi vendet evropiane për mbështetjen e tyre, udhëheqësi ukrainas ishte i kujdesshëm për të balancuar shqetësimin e tij me ngjarjet e së premtes në Zyrën Ovale me një dëshirë të qartë për të vazhduar bisedën me Uashingtonin.

Zelensky tha se ai nuk mendonte se SHBA do të ndalonte ndihmën e saj për Ukrainën, sepse si “udhëheqës të botës së qytetëruar” ata nuk do të donin të ndihmonin presidentin rus Vladimir Putin.

Por ai tha se mbetet i përgatitur për çdo rezultat.

“Për sa i përket shpëtimit të marrëdhënieve, mendoj se marrëdhënia jonë do të vazhdojë”, u tha Zelensky gazetarëve.

Por ai shtoi: “Unë nuk mendoj se është e drejtë kur diskutime të tilla janë plotësisht të hapura. Formati i asaj që ndodhi, nuk mendoj se solli diçka pozitive apo shtesë për ne si partnerë”

Raportohet se në samitin e së dielës, kryeministri britanik Keir Starmer tha se liderët evropianë kishin rënë dakord të hartonin një plan paqeje në Ukrainë për ta çuar në SHBA, me shpresën se Uashingtoni do të ofronte garancitë e sigurisë që Kievi thotë se janë jetike për të penguar Rusinë.

“Të gjithë duhet të kuptojnë se Ukraina nuk do të njohë kurrë çfarëdo që është e pushtuar nga Rusia si territore ruse”, tha Zelensky.

“Për sa i përket dorëheqjes, nëse do të ndryshohem… nuk do të jetë e lehtë të më ndryshosh, sepse nuk mjafton thjesht të bësh zgjedhje. Do të duhet të më pengosh të marr pjesë në zgjedhje dhe do të jetë pak më e vështirë”, shtoi ai.

Ndryshe, Zelensky përsëriti se nëse Ukrainës i jepet anëtarësimi në NATO, ai do të kishte përmbushur misionin e tij.