112-vjetori i pavarësisë bën bashkë Ramën e Kurtin në Vlorë

Kremtja e përvjetorit të Pavarësisë ka nisur me ngritjen e flamurit në Vlorë, aty ku 112 vjet më parë Shqipëria u shpall shtet më vete. Ceremonia bëri bashkë edhe kryeministrat Edi Rama e Albin Kurti. Liderë shtetërorë përçuan mesazhe për bashkim e për arritje të kombit shqiptar.

Dita e Pavarësisë së Shqipërisë ka bërë bashkë në kremte kryeministrat Edi Rama e Albin Kurti, raportet e të cilëve janë lënduar prej rreth dy vitesh.

Së bashku edhe me presidentin e Shqipërisë, Bajram Begajn, kryetaren e Kuvendit, Elisa Spiropali, ata morën pjesë në ceremoninë qendrore të ngritjes së flamurit në Vlorë, me rastin e përvjetorit të 112-të të Pavarësisë.

Më pas përshëndetën qytetarët, të cilët të shumtë në numër iu bashkuan festimeve për shënimin e 28 Nëntorit.

Në kremte, munguan fjalimet.

E, në rrjete sociale, kryeministri Kurti ka shkruar për kremten së bashku me liderët e Shqipërisë. Tha se synimi për arritjen e pavarësisë së Shqipërisë pati bërë bashkë edhe mendimtarë e veprimtarë patriotë, 112 vjet më parë.

“Na lanë një trashëgimi historike e detyrë kombëtare, që atdheun ta duam, ta mbrojmë, ta përparojmë. Sot e festojmë atë ditë, me shumë herë më pak vuajtje sesa në të kaluarën. E kemi më të lehtë sot të bëhemi bashkë, e të jemi bashkë. Sepse duhet të qëndrojmë bashkë. Për sa më shumë zhvillim e demokraci, mirëqenie e prosperitet për qytetarët tanë në Kosovë e në Shqipëri”, ka shkruar Kurti.

Për festën e Pavarësisë uruan edhe kryeministri Rama e edhe presidenti Begaj.

“Kudo ku janë bashkatdhetarët tanë, i ftoj nga Vlora e Pavarësisë që, në çdo angazhim që kanë e iniciativë që ndërmarrin, të kenë vetëdijen e vendosmërisë, bukurisë, sakrificës, e të çojnë përpara arritjet e Shqipërisë e kombit shqiptar”, ka uruar Begaj.

Flamuri i ngrit në Vlorë, e festimet kryesore u shënuan në kryeqytet.

Në Tiranë u bënë bashkë qytetarë nga pothuajse të gjitha trojet shqiptare.

Në Paradën e Shqiptarëve, parakaluan 350 grupe artistike nga 150 qytete të ndryshme ku jetojnë shqiptarët, përfshirë edhe Shtetet e Bashkuara dhe vendet e Bashkimit Evropan.

Festa e Pavarësisë u shënua edhe me aktivitete të tjera kulturore në mbarë Shqipërinë.