34-vjeçari nga Malisheva i hakmerret rojës së pyllit i cili e preu në besë pasi i dha ryshfet

Një 34-vjeçar nga fshati Llozicë i Malishevës e ka zbuluar një rast të ryshfetit në të cilin ka qenë vetë i përfshirë në vitin 2019. Informacionet për këtë rast i njëjti i ka dhënë derisa po intervistohej për një rast që ka ndodhur dy ditë më parë.

M.B., ka deklaruar se në vitin 2019 derisa ka qenë duke prerë dru në pronën publike e kishte takuar rojtarin e pyllit, H.K., të cilit ia kishte dhënë 30 euro në mënyrë që të mos e denoncojë.

Por pas një kohe, të dyshuarit M.B., i kishte ardhur një vendim nga Gjykata ku ishte dënuar me 150 euro për këtë rast. Kjo e kishte bërë atë t’i kërkojë ‘llogari’ rojës së pyllit, të cilit i dha ryshfet. Bisedën të cilën e kishte zhvilluar me të, i dyshuari e ka iniciuar, ku ai dëgjohet duke e pranuar faktin që ka marrë ryshfet. Këtë audio-incizim ai e ka dërguar në Polici, çka ka bërë që të nisin hetimet ndaj të dyshuarve për marrje dhe dhënie ryshfeti.

Lidhur me rastin, Sinjali mëson se H.K., ende s’është intervistuar pasi akoma nuk është siguruar prezenca e tij.