Kontrata e miratuar me Kishën Ortodokse Serbe është absolutisht në pajtim me Kushtetutën e Malit të Zi dhe ligjet në vend, ka thënë kryeministri i Malit të Zi, Dritan Abazoviç.
Po qe se nuk është kështu, tha Abazoviç, ajo mund të dërgohet për rishikim në Gjykatën Kushtetuese të vendit për t’u verifikuar.
Marrëveshja që kryeminsitrit të Malit të Zi ia humbi mbështetjen më të madhe parlamentare të Partisë Demokratike të Socialistëve, dhe e cila bëri që qeverisë së tij t’i shkurtohet mandati, Abazoviç konsideron se duhet të kryhet.
“Prioriteti ynë mbetet rruga evropiane, dhe në mënyrë që ajo të realizohet, asnjë çështje nuk duhet të qëndrojë si pengesë ndaj saj. Ne nuk hapim çështje kishtare, ne i mbyllim ato. Ato u hapëm para dhjetë viteve. Është absolutisht në pajtim me Kushtetutën dhe ligjet, secili akt, qoftë kontratë ose ligj, mundet, që nëse dikush inicion atë para Gjykatës Kushtetuese, t’i nënshtrohet verifikimit”, tha Abazoviç, raportoi “Vijesti”
Nuk është herë e parë, sipas Dritan Abazoviç, që gjërat t’i nënshtrohen testeve kushtetuese. Përveç tjerash, ai tha se një çështje e tillë nuk futet në prioritetet e qytetarëve.
“Kjo është një pikë të cilën e kemi trashëguar, si dhe disa çështje tjera që janë të hapura sot dhe të cilat duhet mbyllur. Mendoj se gjëja më e mençur është ta mbyllim atë dhe të përqendrohemi në hapjen e kapitujve 23 dhe 24”, ka thënë Dritan Abazoviç në një konferencë për media.
Abazoviç të premten e kaluar miratoi draft-kontratën për të ashtuquajturën Marrëveshja Themeltare mes shtetit të Malit të Zi dhe Kishës Ortodokse Serbe, gjë e cila shkundi besimin ndaj qeverisë së tij.
