Kryetari i Lidhjes Demokratike të Kosovës (LDK), Lumir Abdixhiku, ka thënë se e djathta – ideologjia që ai dhe partia e tij përfaqësojnë – po bashkohet dhe se mbështetja popullore po i ofrohet.
Këto komente, Abdixhiku i ka bërë përmes një postimi në Facebook, pasi që ka qëndruar në oda të fshatit Isniq të Deçanit dhe Vranocit të Pejës, ku tha se aty e kanë pritur kryefamiljarë në dy oda të mbushura plot.
“Përtej ‘Turneut të Ndryshimit’ e takimeve programore, mbrëmjet mes qytetarëve tanë – pra takimet nëpër oda e ambiente familjare – mbesin jo vetëm takime origjinale, por dhe takime me qëllime primare të kthimit të LDK-së tek adresa e vet identitare, tek populli”, shkroi kreu i LDK-së.
Lideri i opozitës potencoi se sa herë që partia që ai udhëheqë ka mbajtur veten mes njerëzve të Kosovës, ka pasur edhe forcën edhe mbështetjen e domosdoshme.
“Devijimet eventuale kanë prodhuar pasoja fatale. Rikthimi ynë këtu, mes njerëzve tanë, ka qenë qëllimi im primar tash e sa kohë. Dhe tani që jemi në origjinë, marrim gjithë mbështetjen për ndryshim!”, shtoi.
Sipas tij, e djathta po bashkohet dhe “mbështetja popullore po ofrohet”.
“Ndryshimi po vjen!”, përfundoi ai.
Ndryshe, pasi që presidentja Vjosa Osmani, caktoi 9 shkurtin e 2025-së si datë për mbajtjen e zgjedhjeve të reja parlamentare, partitë politike kanë nisur premtimet dhe takimet me qytetarët në përpjekje e sipër për të marrë besimin e tyre për të drejtuar vendin.
