Ish-deputeti i Kosovës, Gramos Agusholli është ndaluar në pikën kufitare në Merdare nga autoritetet e Serbisë.
I njëjti e kishte në plan të udhëtonte drejt Sllovenisë përmes Serbisë, njofton Klankosova.tv.
Kjo u bë e ditur nga Ministria e Punëve të Jashtme e Kosovës e cila përmes një njoftimi në Facebook i ka bërë thirrje Bashkësisë Ndërkombëtare të reagojë dhe kërkoi lirimin e menjëhershëm të Agushollit.
“Ministria e Punëve të Jashtme dhe Diasporës ka njoftuar menjëherë misionet diplomatike të shteteve të KUINT-it dhe Zyrën e BE-së në Kosovë, si dhe ka ndërmarrë hapat e nevojshëm për të siguruar informacione të plota dhe zyrtare në lidhje me rastin.
MPJD dënon fuqishëm këtë veprim arbitrar të autoriteteve serbe dhe i bën thirrje Bashkësisë Ndërkombëtare të reagojë menjëherë, duke kërkuar lirimin e menjëhershëm të z. Gramos Agusholli dhe ndalimin e praktikave të tilla represive, të cilat bien ndesh me parimet themelore të të drejtës ndërkombëtare dhe me konventat ndërkombëtare për të drejtat e njeriut.
Ministria e Punëve të Jashtme dhe Diasporës do të mbajë të informuar të gjithë partnerët ndërkombëtarë për çdo zhvillim të mëtejshëm në lidhje me këtë rast. Çdo informacion i ri do të shpërndahet menjëherë pas konfirmimit zyrtar”, thuhet në njoftimin e MPJD-së.
