Ai u hodh në motorin e aeroplanit, pamje të tmerrshme të regjistruara nga kamera

Një tragjedi ka ndodhur në aeroportin e Bergamos – Orio al Serio në Itali, ku një burrë ka humbur jetën pasi është thithur nga motori i një aeroplani që po përgatitej për ngritje.

Sipas raportimeve të Corriere della Sera, burri, i cili besohet të jetë rreth 35 vjeç, është futur në pistë me forcë dhe është drejtuar drejt aeroplanit të kompanisë Volotea, një Airbus A319, që ishte në fazën e manovrës për të dalë nga vendqëndrimi.

Një dëshmitar okular e përshkroi incidentin si më poshtë : “Pashë gjithçka ndërsa po hipja në një aeroplan tjetër. Oficerët u përpoqën ta ndalonin burrin, por ai vrapoi drejt motorit të majtë të aeroplanit dhe u hodh brenda. Ishte diçka që nuk do të donim ta shihnim kurrë . ”

Sipas hetimeve të deritanishme, ai kishte braktisur automjetin e tij jashtë aeroportit dhe kishte hyrë në brendësi të tij duke kaluar përmes një dyere sigurie që çon në zonën e parkimit të aeroplanëve.

Aeroplani ishte në procesin e “pushback”, manovrës që bëhet para ngritjes. Incidenti ka shkaktuar pezullimin e fluturimeve në aeroportin e Bergamos nga ora 10:20 deri në orën 12:00, sipas konfirmimeve nga SACBO, kompania që menaxhon aeroportin.

Hetimet janë ende në vazhdim për të zbuluar arsyet e këtij incidenti tragjik. Për momentin, autoritetet po shqyrtojnë rrethanat që çuan në vdekjen e burrit dhe do të dalin me një raport përfundimtar pas hetimeve.