Në aksionin e madh të IPK-së merr pjesë edhe Dogana e Kosovës.
“Policia e Kosovës renditet si institucioni i dytë më i besueshëm për qytetarët dhe kjo natyrisht është falë punës së zyrtarëve policor dhe jo vetëm”, ka nisur shkrimin në llogarinë e tij në Facebook, Ministri i Punëve të Brendshme të Kosovës, Xhelal Sveçla, pas raportimeve për aksionin e madh të Inspektoratit të Policisë së Kosovës në arrestimin e disa zyrtarëve policorë të cilët dyshoht se kanë kryer veprat penale “marrje ryshfeti” dhe “keqpërdorim i pozitës apo autoritetit zyrtar”.
“Ne jemi zotuar që këtë vlerësim do ta ruajmë dhe do të punojmë maksimalisht që ta ngrisim më lartë. Në kuadër të kësaj, të gjithë ata që tentojnë apo e njollosin punën e ndershme dhe profesionale të zyrtarëve tjerë policor, nuk kanë vend në Policinë e Kosovës. Policia e Kosovës nuk do të jetë më asnjëherë vendi ku thyhet ligji e bëhet korrupsioni”, ka vazhduar më tej Sveçla.
Si Ministër i Punëve të Brendshme, Sveçla tha se “do të vazhdoj të jap mbështetjen time maksimale për secilin zyrtar policor veç e veç dhe për Policinë në tërësi në arritjen e qëllimeve të tyre madhore për të garantuar rend, ligj e siguri për të gjithë qytetarët në tërë territorin e Republikës së Kosovës”.
Në fund ai ka falënderuar Inspektoratin Policor të Kosovës dhe institucionet vartëse të MPB-së të cilët me seriozitet dhe ndershmëri punojnë maksimalisht në shërbim të qytetarëve dhe në përmirësimin e shërbimeve ndaj tyre.
“Qëllimi ynë kryesor është të garantojmë integritet dhe profesionalizëm brenda të gjitha agjencive që drejtojmë. Në kuadër të kësaj, kushdo që cënon integritetin e institucionit, padyshim do të përballet me drejtësinë sipas ligjeve në fuqi”, ka përfunduar ministri.
