Shoigu pretendon se si pjesë e stërvitjeve ushtarake, të koduara me emrin Global Thunder, dhjetë bombardues praktikuan përdorimin e njëkohshëm të armëve bërthamore kundër Rusisë.
Ministri rus i Mbrojtjes Sergei Shoigu tha të martën se bombarduesit bërthamorë amerikanë kishin kryer dhjetëra fluturime luftarake gjatë javëve të fundit për të përcaktuar gatishmërinë e Rusisë për luftë bërthamore, raportoi RT .
“Ka pasur një rritje të konsiderueshme në aktivitetet e bombarduesve strategjikë amerikanë jo shumë larg kufirit rus,” tha Shoigu pas takimit me homologun kinez Wei Fenghe .
“Në muajin e fundit janë kryer rreth 30 misione jo shumë larg kufijve të Federatës Ruse, rreth dy herë e gjysmë më shumë se vitin e kaluar në të njëjtën periudhë”, shtoi Shoigu.
Shoigu pretendon se si pjesë e një stërvitjeje të fundit ushtarake amerikane, të koduar me emrin Global Thunder, dhjetë bombardues strategjikë praktikuan përdorimin e njëkohshëm të armëve bërthamore kundër Rusisë nga perëndimi dhe lindja. Ai shtoi se bombarduesit ishin të paktën 20 kilometra larg kufijve rusë.
Shoigu tha më pas se marrëdhëniet midis Rusisë dhe Kinës u bënë më të rëndësishme për shkak të “turbulencave aktuale gjeopolitike dhe rritjes së rrezikut të konfliktit”.
Deklaratat e ministrit rus të Mbrojtjes vijnë në një kohë tensionesh të mëdha mes Rusisë dhe NATO-s, kryesisht për shkak të çështjes së Ukrainës.
Kievi pretendon se akumulimi i trupave ruse në kufirin me Ukrainën mund të jetë një prelud i një pushtimi. Moska i mohon me vendosmëri akuzat.
“Lëvizjet e armëve dhe trupave tona në territorin tonë janë puna jonë”, thuhet në një deklaratë të qeverisë ruse.
