Ministri i Punëve të Jashtme të Spanjës, José Manuel Albares, në një intervistë për gazetën spanjolle “El Periódico” të hënën, duke komentuar mbi vendimin e fundit të ekzekutivit spanjoll për njohjen e vlefshmërisë së pasaportës së Kosovës, përsëriti se kjo nuk nënkupton lëvizje drejt njohjes të pavarësisë dhe sovranitetit të Kosovës, por njëfarë pranimi të realitetit.
Duke u përgjigjur në pyetjen se në mos njohja e pasaportës kosovare do të thotë një hap drejt normalizimit, nëse jo drejt njohjes formale, kryediplomati spanjoll deklaroi se “nuk mund të pretendojmë se nuk ekziston” një shtet i pavaruar dhe sovran në Ballkanin Perëndimor, ndërsa shtoi se Spanja nuk do të bëhet pengesë për normalizimin e raporteve Kosovë-Serbi.
“Sigurisht që jo. Spanja nuk do të jetë kurrë pengesë për dialogun ndërmjet Beogradit dhe Prishtinës. As për afrimin mes Prishtinës dhe Bashkimit Evropian (BE). Territori i Kosovës është brenda Ballkanit Perëndimor dhe merrë pjesë në samitet e BE-së. Nuk mund të pretendojmë se nuk ekziston. Por kjo nuk do të thotë se ne e njohim sovranitetin e Kosovës“.
Sëkëndejmi, njohja e pasaportës kosovare, përkundër faktit se Spanja nuk e njeh pavarësinë e Kosovës, hapi sërish çështjen e rebusit Kosovë-Spanjë-Katalonjë në politikën spanjolle. Kryeministri i Spanjës, Pedro Sanchez, aktualisht është duke u akuzuar nga Partia Popullore (PP) – forca kryesore opoziztare – për nxitjen e lëvizjeve seperatiste dhe minimin e shtetit spanjoll.
“Ky është një nga mashtrimet e PP-së. Edhe Spanja duhet të përshtatet ashtu sikurse pjesa tjetër e shteteve që nuk e njohin. Prandaj, pranuam pasaportat kosovare. Edhe një herë, kjo nuk nënkupton njohje të pavarësisë apo sovranitetit të Kosovës. Ne jemi pesë shtete brenda BE-së që nuk e njohim Kosovën, por i pranojmë pasaportat kosovare”, shtoi Albares.
Të shtunën e kaluar u konfirmua se Spanja njohu pasaportën e Kosovës, duke lejuar lëvizjen e lirë të kosovarëve, sikurse në vendet tjera të zonës Schengen nga 1 janari 2024. Gjithashtu, katër vendet e tjera të BE-së (Rumania, Qipro, Greqia dhe Sllovakia), ndonëse nuk e njohin pavarësinë dhe sovranitetin e Kosovës, pranojnë vlefshmërinë e pasaportës kosovare.
