Aleati i Putinit paralajmëron: Furnizimi me armë i Ukrainës nga perëndimi, do të sjellë katastrofë globale

Dërgesat e armëve perëndimore në Ukrainë që kërcënojnë territoret ruse do të çojnë në një “katastrofë globale”, ka paralajmëruar një aleat i ngushtë i Vladimir Putin, shkruan Sky News.

Vyacheslav Volodin tha se një veprim i tillë do t’i bënte gjithashtu të paqëndrueshme argumentet kundër përdorimit të armëve të shkatërrimit në masë.

Në një postim në Telegram, kryetari i Dumës, dhoma e ulët e parlamentit të Rusisë, paralajmëroi se mbështetja e Shteteve të Bashkuara dhe NATO-s për Ukrainën po e çon botën në një “luftë të tmerrshme”.

“Nëse Uashingtoni dhe vendet e NATO-s furnizojnë armë që do të përdoren për të goditur qytetet civile dhe do të tentojnë të kapin territoret tona, siç kërcënojnë, kjo do të çojë në masa hakmarrëse duke përdorur armë më të fuqishme”, shkroi Volodin.

Ai shtoi se kjo ishte për shkak se SHBA dhe NATO “nuk u përballën me një situatë ku të ekzistonte një kërcënim për sigurinë e qytetarëve të tyre dhe integritetin territorial të vendit”.

Aleatët perëndimorë premtuan miliarda dollarë armë për Ukrainën javën e kaluar, megjithëse nuk arritën të bindin Gjermaninë të heqë veton për sigurimin e tankeve luftarake Leopard të prodhimit gjerman.

Tanket mbahen nga një sërë vendesh të NATO-s, por për t’i transferuar ato në Ukrainë, vendet kanë nevojë për miratimin e Berlinit.