Ambasadori i SHBA-së në Izrael: Nëse Franca do një shtet palestinez, le ta ndërtojë atë në Rivierën Franceze

Ambasadori i SHBA-së në Izrael, Mike Huckabee, ka sulmuar ashpër avokimin e Francës për njohjen e një shteti palestinez, duke thënë se nëse mbështet një rezultat të tillë, mund të “shkëputë një copë të Rivierës Franceze” dhe të krijojë një të tillë.

Franca po bashkëkryeson këtë muaj me Arabinë Saudite një konferencë ndërkombëtare në Kombet e Bashkuara që synon ringjalljen e idesë së një zgjidhjeje me dy shtete, të cilën qeveria e kryeministrit izraelit Benjamin Netanyahu e kundërshton.

Parisi gjithashtu ka thënë se mund ta njohë vetë një shtet palestinez këtë vit, shkruajnë mediat e huaja.

Dhe në një intervistë me Fox News të botuar të shtunën, Huckabee e quajti iniciativën në OKB “jashtëzakonisht të papërshtatshme kur Izraeli është në mes të një lufte”.

“7 tetori ndryshoi shumë gjëra”, tha ai, duke iu referuar sulmit të Hamasit në vitin 2023 ndaj Izraelit që shkaktoi luftën në Gaza.

“Nëse Franca është vërtet kaq e vendosur të shohë një shtet palestinez, kam një sugjerim për ta – të krijojnë një copë të Rivierës Franceze dhe të krijojnë një shtet palestinez. Ata janë të mirëpritur ta bëjnë këtë, por nuk janë të mirëpritur të imponojnë atë lloj presioni mbi një komb sovran”.

Izraeli të premten akuzoi presidentin francez Emmanuel Macron se ka ndërmarrë një “kryqëzatë kundër shtetit hebre” pasi ai u bëri thirrje vendeve evropiane të “ashpërsojnë” qëndrimin e tyre ndaj Izraelit nëse situata humanitare në Gaza nuk përmirësohet.

Një ditë më parë, Izraeli njoftoi krijimin e 22 vendbanimeve të reja në Bregun Perëndimor, me ministrin e Mbrojtjes, Israel Katz që më vonë u zotua të ndërtojë një “shtet hebre izraelit” në territorin e pushtuar.

Krijimi i vendbanimeve dënohet rregullisht nga Kombet e Bashkuara duke u vlerësuar si të paligjshme sipas ligjit ndërkombëtar dhe shihen si një pengesë e madhe për zgjidhjen me dy shtete.