Shtetet e Bashkuara të Amerikës janë të përkushtuara për të ndihmuar Kosovën në rrugën drejt institucioneve europiane dhe euro-atlantike.
Ky ishte një ndër mesazhet që përcolli në Prishtinë, Ndihmës sekretarja e shtetit për çështje Europiane dhe Euroaziatike, Karen Donfried.
“Është shumë e rëndësishme dhe urgjente të punojmë për të siguruar që Kosova dhe fqinjët e saj të vazhdojnë të bëjnë reformat e domosdoshme për konsolidimin demokratik dhe integrimin e tyre në institucionet europiane dhe euro-atlantike”, u shpreh zyrtarja e administratës Biden, pas takimit me presidenten, Vjosa Osmani.
Donfried nënvizoi se procesi i dialogut me Serbinë, i lehtësuar nga Bashkimi Europian, duhet ta ketë në qendër njohjen e ndërsjellët. Osmani theksoi nevojën urgjente për përparim në dialogun me Beogradin dhe saktësoi se Prishtina nuk është palë bllokuese në këtë proces. Zyrtarja amerikane, e cila në këtë vizitë shoqërohet nga i dërguari special për Ballkanin Perëndimor, Gabriel Escobar, u takua dhe me kryeministrin, Albin Kurti.
