Teki Shala mbeti pa punë që nga 23 prilli i këtij viti kur ish-kryeministri Albin Kurti e shkarkoi atë nga pozita si anëtar i Bordit të Përkohshëm të Telekomit të Kosovës.
Por, anëtari i Lidhjes Demokratike të Kosovës i cili refuzonte t’ia bënte kuorumin bordit të kaluar të Telekomit, është rikthyer sërish në bordin e ri të ndërmarrjes publike.
Ai është emëruar sot në të njëjtën pozitë me vendim të qeverisë aktuale të Kosovës, të udhëhequr nga kryeministri Avdullah Hoti.
Përveç Shalës, i cili është anëtar i LDK-së në pushtet dhe ish-drejtor i Drejtorisë për Buxhet dhe Financa në Komunën e Gjakovës, Qeveria e Kosovës emëroi sot edhe tre anëtarët e tjerë të bordit të Telekomit.
Atë do ta përbëjnë edhe Mehmet Berisha, Kushtrim Krasniqi e Blerim Shehu. Berisha do ta kryesojë këtë bord, vendosi sot Qeveria.
Për dallim nga Shala, një mbështetës i hapur dhe anëtar i partisë kryesore të koalicionit, për tre drejtorët e tjerë të bordit nuk ka të dhëna që tregojnë për lidhje të mundshme të tyre me politikën.
Kryesuesi i Bordit, Mehmet Berisha është jurist me profesion dhe punon prej gati 8 vitesh në Agjencinë Kosovare të Privatizimit. Aktualisht është ushtrues detyre i Departamentit Ligjor në AKP.
As për Blerim Shehun, anëtarin tjetër të Bordit të Përkohshëm të Telekomit nuk ka dëshmi që e lidhin atë me parti politike. Të dhënat publike tregojnë se ai e ka origjinën nga Komuna e Prizrenit dhe se përvoja e tij kryesore lidhet me financa në institucionet publike.
Përvojë të ngjashme del të ketë edhe Kushtrim Krasniqi, i cili së fundmi ka qenë i angazhuar si ekspert i jashtëm i auditimit në Bankën për Biznes (BPB). Më parë ka punuar si analist financiar në USAID.
Bordi i Përkohshëm i Telekomit të Kosovës ka dhënë dorëheqje të martën pas vendimit për tërheqjen e 26 milionë eurove nga llogaria e kompanisë publike.
