Organizatat për të drejtat e njeriut raportojnë se autoritetet në Arabinë Saudite ekzekutuan brenda një dite 81 persona të dënuar për krime të ndryshme, më shumë se të gjitha ekzekutimet që u kryen gjatë gjithë vitit të kaluar.
Grupi, ku përfshihen 7 jemenas dhe një shtetas sirian, ishin dënuar për krime të rënda, duke përfshirë terrorizmin. Disa prej tyre i përkisnin grupit të Shtetit Islamik , al-Kaedës ose rebelëve Houthi në Jemen.
Organizatat e të drejtave thonë se shumë prej tyre nuk kishin marrë gjykime të drejta, një pretendim që qeveria e Arabisë Saudite e kundërshton.
Sipas agjencisë së lajmeve SPA, grupi i fundit ishte gjykuar nga 13 gjyqtarë dhe kishte kaluar në një proces gjyqësor me tre faza.
Ata u akuzuan për komploti e sulme ndaj objektivave jetike ekonomike, vrasje ose shënjestrim i anëtarëve të forcave të sigurisë, rrëmbim, torturë, përdhunim dhe kontrabandë armësh.
Arabia Saudite ka një nga nivelet më të larta të ekzekutimit në botë, e pesta në listën e përpiluar nga Amnesty International, katër të tjerat janë Kina, Irani, Egjipti dhe Iraku.
