Kryeministri i Kosovës, Albin Kurti, sot ka emëruar Arben Vitinë, Ministër për Shëndetësi, të cilit i ka uruar suksese në plotësimin e detyrave dhe përgjegjësive të tij.
Kjo u bë e ditur përmes një komunikate njërreshtëshe nga Zyra për Informim e Kryeministrisë, raporton Klankosova.tv.
Arben Vitia, më 1 tetor 2021 pati dhënë dorëheqje nga posti i ministrit të Shëndetësisë, për t’iu futur garës për të parin e Prishtinës.
“Unë sot po e përmbyllë këtë detyrë që ma besuan. Unë nga tani e tutje do të jem pjesë e një ekipi tjetër që ka në fokus kryeqytetin tonë”, kishte thënë Vitia.
Por në këtë garë, ai u mposht nga kundërkandidati i tij i LDK-së, Përparim Rama, dhe që nga atëherë është zhdukur pothuajse në tërësi nga jeta publike.
Ai ishte angazhuar në një institucion privat shëndetësor, prej ku edhe kaloi për të marrë timonin e dikasterit të shëndetësisë.
Në vendin e Vitisë ishe emëruar ushtruese e detyrës së ministres së Shëndetësisë, Dafina Gexha-Bunjaku.
Më pas në këtë pozitë erdhi Rifat Latifi, porse i njëjti dha dorëheqje pas gati një viti në detyrë, ndërsa në vendin e tij u rikthye Gexha-Bunjaku përsëri si ushtruese e detyrës për gati tre muaj.
Kjo është hera e tretë e Vitisë që emërohet si ministër i Shëndetësisë. Hera e parë ishte në qeverinë LVV-LDK të vitit 2020.
