Argjentina është kampione e botës në futboll. Argjentina ka mposhtur Francën në finale me penallti.
Ndeshja nisi me një ritëm dukshëm më të lartë të argjentinasve, të cilët kërkonin vazhdimisht golin.
Angel Di Maria e pati një rast shumë të mirë në minutën e 18-të, por në hyrje të zonës ai goditi mbi portë.
Ndërkohë, në aksionin pasardhës, Di Maria e fiton një penallti, pasi në zonë u shty nga Ousmane Dembele.
Si zakonisht, Lionel Messi e mori përsipër për ta ekzekutuar 11-metërshin, duke u treguar i saktë për 1:0.
Ky ishte goli i gjashtë i Messi-t në këtë Botëror, ndërsa 12 ka realizuar në total në të gjitha Kampionatet e Botës ku ka marrë pjesë.
Pas këtij momenti, argjentinasit nuk u ndalën duke e kërkuar edhe golin e dytë.
Dhe, atë e gjetën në minutën e 36-të, kur pas një kundërsulmi fantastik, Alexis Mac Allister e gjen krejtësisht të vetëm Angel Di Maria-n, i cili me një parabolë të lehtë shënoi për 2:0.
Deri në fund të pjesës së parë raste konkrete më nuk pati, por duhet theksuar se trajneri i Francës, Didier Deschamps ka bërë dy zëvendësime.
Ka larguar nga loja Olivier Giroud dhe Ousmane Dembele, i futi Marcus Thuram dhe Randal Kolo Muani.
Pjesa e dytë gjithashtu nisi shumë më mirë për Argjentinën, ku francezët nuk po arrinin të tregonin asgjë.
Pjesë e dobët gjithashtu ishte edhe Kylian Mbappe, i cili nuk ishte vërejtur deri në minutën e 80-të, atëherë kur iu nevojitën vetëm 2 minuta, apo më saktë, 97 sekonda për ta barazuar rezultatin.
Të parin e shënoi në minutën e 80-të nga penalltia e fituar nga Kolo Muani, ndërsa në aksionin pasardhës e shënoi edhe të dytin pas një asistimi të Marcos Thuram.
Pas këtyre golave, ndeshja ishte e mbyllur nga dyja skuadrat, të cilat prisnin fishkëllimën e fundit të gjyqtarit për të vazhduar në vazhdime.
Vlen të theksohet se Messi e pati një rast shumë të mirë krejt në fund të ndeshjes, por goditjen e tij të fortë mezi e priti Hugo Lloris.
Në vazhdime, në pjesën e dytë të tyre, Argjentina kaloi në epërsi, gol ky që u duk se do t’ia japë titullin kampion bote.
Megjithatë, francezët përsëri nuk u dorëzuan dhe arritën të shënonin në minutën e 118-të, kur përsëri realizues ishte Mbappe nga pika e bardhë e penalltisë.
Ndeshja doli të jetë më e “çmendur” se sa u mendua në fund, kur fillimisht Lautaro Martinez pati një rast të artë në sekondat e fundit, pastaj menjëherë në aksionin pasues, Kolo Muani nuk shënoi gjithashtu i vetëm përballë portierit.
Në ekzekutimin e penalltive, argjentinasit shënuan me anë të Messi, Paredes, Dybala dhe Montiel.
Kurse te francezët gabuan Tuchuameni dhe Coman, ndërsa shënuan Mbappe dhe Kolo Muani.
