Shefi i Zyrës së Bashkimit Evropian në Kosovë, Tomáš Szunyog, ka thënë të mërkurën se Këshilli Prokurorial i Kosovës ka bërë përzgjedhjen e Kryeprokurorit të Shtetit duke shpërfillur thirrjet e BE-së për përzgjedhje të drejtë, transparente dhe të bazuar në merita.
Szunyog ka thënë përmes një statusi në Twitter se janë të habitur dhe të zhgënjyer me veprimet e Këshillit Prokurorial.
“Pavarësisht thirrjet të vazhdueshme të BE-së për të siguruar përzgjedhje të drejtë, transparente dhe të bazuar në merita, të Kryeprokurorit të Shtetit, Këshilli Prokurorial e ka përfunduar përzgjedhjet duke i mos i respektuar këto principe. Të befasuar dhe të zhgënjyer me veprimet e KPK-së”, thuhet në postimin e Szunyog.
Këshilli Prokurorial i Kosovës ka votuar të mërkurën unanimisht për Blerim Isufajn për Kryeprokuror të ri të Shtetit.
Paraprakisht, Komisioni për Rishqyrtim i KPK më 1 prill 2022 kishte shqyrtuar kundërshtimet e katër kandidatëve për pozitën e Kryeprokurorit të Shtetit, Armend Hamiti, Lulzim Sylejmani, Shqipdon Fazliu dhe Kujtim Munishi.
Isufaj nga KPK është propozuar për dekretim, tek presidentja e Republikës së Kosovës.
Zgjedhja e Isufajt për Kryeprokurorit të Shtetit ka nxitur edhe reagimet e organizatave joqeveritare, Instituti i Kosovës për Drejtësi (IKD), Grupi për Studime Juridike dhe Politike (GLPS) dhe Lëvizja FOL, të cilat e kanë vlerësuar të papranueshëm propozimin e Këshillit Prokurorial të Kosovës (KPK), për emërimin e Kryeprokurorit të ri të Shtetit.
