BE: Serbia me ligjin për juridiksion në Kosovë shkel obligimet nga dialogu

Masat e Serbisë ndaj Kosovës, përmes së cilave ky shtet dëshiron të marrë kompetenca për të proceduar rastet e veprave edhe në territorin e Kosovës, shihen nga Bashkimi Evropian si shkelje e qartë e obligimeve të Serbisë nga dialogu si dhe marrëveshjet e arritura në këtë proces.

Bashkimi Evropian kërkon që Serbia të rishqyrtojë këtë draftligj dhe rikujton se Serbia ka obligime ndaj të gjitha marrëveshjeve nga procesi i dialogut. Këto porosi në emër të BE-së si përgjigje mediave ua ka dërguar Nabila Massralli, një zëdhënëse në BE për çështjet e politikës së jashtme dhe sigurisë.

“Qysh prej Marrëveshjes së Brukselin nga vitit 2013, Kosova dhe Serbia kanë obligime të qarta sa i përket juridiksionit përkatës. Draftligji i Qeverisë së Serbisë përmes së cilit e deklaron Kosovën si një zonë të mbrojtjes së veçantë, si dhe për juridiksionin që autoriteteve gjyqësore të merren me veprat kriminale në Kosovë, në mënyrën si janë publikuar, paraqesin shkelje të qarta nga ana e Serbisë të obligimeve nga dialogu dhe shkojnë në kundërshtim me përkushtimin e përsëritur rishtazi në kuadër të dialogut. BE ia rikujton Serbisë se e ka obligim ndaj të gjitha Marrëveshjeve të dialogut si pjesë përbërëse e integrimeve në BE dhe i bën thirrje Serbisë që të rishqyrtojë këtë draftligj në mënyrë përkatëse”, ka thënë kjo zëdhënëse e Bashkimit Evropian.

Ky është reagimi më i qartë deri tash i BE-së ndaj masave që Serbia kishte thënë se do t’i ndërmarrë ndaj Kosovës dhe në territorin e Kosovës.