Bënte ‘kërdinë’ me vjedhje në Tiranë, arrestohet 40-vjeçari nga Ksamili

Një 40-vjeçar në Tiranë ka rënë në prangat e Policisë, pasi dyshohet për vjedhjen e 5 dyqaneve, të kryera gjatë muajve prill dhe maj, si dhe tentativën për vjedhjen e një tjetër dyqani.

Përmes një njoftimi Policia bën të ditur se 40-vjeçari rezulton të ketë qenë i dënuar më parë për të njëjtën veprimtari kriminale, shkruan A2 CNN.

Po ashtu bëhet me dije se 40-vjeçari është banues në Ksamil dhe po punohet për zbardhjen e vjedhjeve të tjera që ai mund të ketë kryer.

Njoftimi i Policisë:

Tiranë/Finalizohet nga Komisariati i Policisë Nr. 2, operacioni policor i koduar “Quick Response”.

Zbardhen 6 vjedhje/tentativa për vjedhje të dyqaneve, të kryera gjatë muajit prill dhe maj. Identifikohet dhe vihet në pranga 40-vjeçari, i dyshuar si autori i tyre.

40-vjeçari, i dënuar më parë për të njëjtën veprimtari kriminale.

Në vijim të punës për parandalimin e vjedhjeve dhe zbardhjen e atyre të ndodhura më parë, shërbimet e Komisariatit të Policisë Nr. 2, pas provave të siguruara nga puna hetimore dhe këqyrjes së kamerave të sigurisë, finalizuan operacionin e koduar “Quick Response”.

Në kuadër të të cilit u vu në pranga shtetasi A. D., 40 vjeç, banues në Ksamil, me precedent të mëparshëm penal.

Nga hetimet dyshohet se ky shtetas ka vjedhur shuma parash dhe sende/artikuj të ndryshëm në 5 dyqane, si dhe ka tentuar të vjedhë në 1 dyqan tjetër.

Punohet për të zbardhur vjedhje të tjera që mund të ketë kryer 40-vjeçari.

Materialet procedurale iu referuan Prokurorisë së Tiranës, për veprime të mëtejshme.