Presidenti i SHBA Joe Biden tha të mërkurën se SHBA po rrit praninë e saj ushtarake në Evropë në planin afatgjatë, për të rritur sigurinë rajonale pas pushtimit rus të Ukrainës.
Në një takim me Sekretarin e Përgjithshëm të NATO-s, Jens Stoltenberg në Madrid, në samitin e liderëve të Aleancës, ai tha se “NATO është e fortë dhe e bashkuar” dhe se hapat që do të ndërmerren gjatë takimit “do të rrisin më tej forcën tonë të përbashkët”.
Biden hapi pjesëmarrjen e tij në samit duke njoftuar se Shtetet e Bashkuara po krijojnë një seli të përhershme në Poloni, duke dërguar dy skuadrone shtesë të avionëve luftarakë F-35 në Britaninë e Madhe dhe se do të dërgojnë më shumë mbrojtje ajrore në Gjermani dhe Itali, raporton AP.
“Sot, unë njoftoj se Shtetet e Bashkuara do të përmirësojnë pozicionin e forcave tona në Evropë dhe do t’i përgjigjen mjedisit të ndryshueshëm të sigurisë, si dhe do të forcojnë sigurinë tonë kolektive”, tha presidenti amerikan.
Stoltenberg, i cili tha më herët të mërkurën se Aleanca po përballej me sfidën e saj më të madhe që nga Lufta e Dytë Botërore, përshëndeti njoftimin e Biden.
“Kjo tregon lidershipin tuaj të vendosur dhe forcën në marrëdhëniet transatlantike,” tha lideri i NATO-s, duke falënderuar Biden për “mbështetjen e tij të palëkundur për Ukrainën”.
Biden tha se Shtetet e Bashkuara do të vendosin përgjithmonë selinë e komandës së Korpusit të 5-të të ushtrisë amerikane në Poloni, një veprim që sipas tij do të forcojë ndërveprimin midis SHBA-së dhe NATO-s në krahun lindor të Aleancës.
Masa shënon dislokimin e parë të përhershëm të forcave të SHBA në skajin lindor të NATO-s.
Biden shtoi se SHBA-të po rritin gjithashtu dislokimin e trupave me rotacion në rajonin e Balltikut.
Pas mbërritjes në samit të martën, Biden njoftoi se Shtetet e Bashkuara do të stacionojnë dy destrojerë shtesë në bazën e tyre detare në Rota, Spanjë, duke e çuar numrin e përgjithshëm të destrojerëve në gjashtë.
Shtetet e Bashkuara aktualisht kanë më shumë se 100,000 anëtarë të vendosur në të gjithë Evropën, rreth 20,000 më shumë se katër muaj para pushtimit të Ukrainës nga presidenti rus Vladimir Putin.
