Në seancën e sotme të Kuvendit do të shqyrtohet në parim projekt-Kodi Civil, i cili lejon martesat e së njëjtës gjini.
Para nisjes së seancës, Bashkësia Islame e Kosovës ka ripërsëritur qëndrimin e saj kundër martesave së të njëjtës gjini.
Sipas BIK-ut ato janë në kundërshtim me parimet islame.
Ky institucion fetar ka shpërndarë në faqen zyrtare një intervistë të Myftiut Naim Tërnava, të dhënë në qershor të vitit të kaluar, ku flitet për këtë temë.
“Nuk kam t’bëj me ligje, unë kam t’bëj me qëndrime në islam. Qëndrimi im është ky dhe nuk ndryshon, pavarësisht çka thotë ligji. Ligji tërë ditën le t’flet, fjala e Zotit është fjalë e Zotit, fjala e Pejgamberit është fjalë e Pejgamberit. Sipas parimeve islame nuk lejohet asesi, në asnjë mënyrë, asnjëherë të shtrembërohet natyrshmëria e të qenit njeri. Nuk lejohen asesi “martesat”, po i quajmë “martesa” të një gjinie”, thotë Tërnava në këtë intervistë.
Ditë më parë, Komisioni për Legjislacion, Mandate, Imunitete ka miratuar projekt-kodin civil që njeh martesat e gjinisë së njëjtë.
