Blerim Latifi: Ja gabimi i madh strategjik që ka bërë Kosova

Profesori universitar, filozofi Blerim Latifi përmes një postimi në Facebook, ka treguar se ku ka bërë Kosova gabimin e madh strategjik.

Sipas tij, Kosova gaboi duke e orientuar politikën e njohjeve drejt shteteve të vogla.

Latifi thekson se Kosova është dashur të fokusohet tek fuqitë e mëdha, si Rusia, Kina, India, Brazili dhe te pesë shtetet e Bashkimit Evropian të cilat vazhdojnë të mos e njohin Kosovën.

Postimi i plotë:

Shteti ynë ka bërë një gabim të madh strategjik duke e orientuar politikën e njohjeve drejt shteteve të vogla. Kemi menduar se duke e rritur numrin formal të njohjeve, vetvetiu do të përmirësohet edhe statusi ynë në bashkësinë ndërkombëtare të shteteve. Nuk është dashur shumë mend për të kuptuar naivitetin e këtij mendimi, sepse dihet fare qartë se edhe nëse do të na njihnin të gjitha shtetet e vogla në Afrikë, Azi, e Amerikë Latine, gjëndja jonë nuk do të ndryshonte për të mirë. Barrierat tona qëndrojnë diku tjetër : tek fuqitë e mëdha, si Rusia, Kina, India, Brazili dhe pesë shtetet e Bashkimit Europian të cilat vazhdojnë të këmbëngulin në mosnjohjen e Kosovës. Prandaj, është dashur qëmoti të hiqnim dorë nga vetmashtrimi me njohjet e vogla, të cilat, për më tepër, na janë kthyer bumerang nga interferimi diplomatik i Serbisë. Çnjohja nga Sierra Leone është më e fundit në këtë histori të gabimeve trashanike të diplomacisë kosovare.