Bojan Bozhoviq kërkon të aderojë në Lëvizjen Vetëvendosje, pret përgjigje pozitive

Bojan Bozhoviq nga komuniteti serb që jeton në Zubin Potok, ka bërë kërkesë të bëhet pjesë e partisë së Albin Kurtit, Vetëvendosjes.

Ai për Koha.net ka thënë se ka aplikuar gjatë ditës së djeshme në selinë e Vetëvendosjes në Mitrovicë, më pas ka kontaktuar edhe me disa persona në Kryesinë e Vetëvendosjes, ndonëse ende s’ka marrë një përgjigje përfundimtare.

Përmes një postimi në Facebook, Bozhoviq lë të kuptohet se pret të bëhet pjesë e Lëvizjes Vetëvendosje.

“Unë mendoj se është e qartë, por ai që është përgjegjës do ta konfirmojë zyrtarisht atë”, thuhet në shkrimin që e ka bërë Bozhoviq mbi një foto, ku shihet selia e Vetëvendosjes në Mitrovicë.

Por një burim brenda VV-së i ka thënë Koha.net se ende s’ka informacione, të paktën jo deri tash, se a do të bëhet ai pjesë e Vetëvendosjes.

Bozhoviq i ka thënë portalit Koha.net se pret një përgjigje pozitive nga Albin Kurti.

“Pajtohem absolutisht me politikën e z.Kurti. Me qëndrimet e tij edhe për Listën Serbe, edhe për veriun e Kosovës. Më duket se ka ardhur koha që të vijnë në pushtet serbët që e pranojnë dhe e duan Kosovën, jo ata që dirigjohen nga Beogradi zyrtar. Edhe nëse Kurti nuk përgjigjet pozitivisht, unë edhe në të ardhmen do të mbështesë politikën e tij, si një qytetar i Kosovës. Në fund të fundit, unë jam banor serb i Kosovës dhe e dua Kosovën. Asnjë parti nuk është pronë private, por megjithatë jam i bindur që Kryesia e Vetëvendosjes do t’i përgjigjet pozitivisht kërkesës sime”, tha Bozhoviq për Koha.net.

Lëvizja Vetëvendosje, që doli partia e parë në zgjedhjet e 6 tetorit të 2019-s, megjithatë po përpiqet të përfshijë brenda grupit të vet parlamentar ose edhe brenda koalicionit të ri me LDK-në, edhe deputetë e figura nga radhët e komuniteteve tjera, raporton Koha.net.

I fundit që aderoi në Vetëvendosje ishte deputeti i IRDK-së, Elbert Krasniqi.

Deri tash, kur është thuajse fundi i rinumërimit të vendvotimeve, është vlerësuar se koalicioni VV-LDK mund ta formojë qeverinë e re të Kosovës.

Për formimin e qeverisë së Kosovës janë të domosdoshme të paktën 61 vota në Kuvend.

Për t’i siguruar votat e nevojshme për qeverinë e re, subjekti fitues i zgjedhjeve, në këtë rast Lëvizja Vetëvendosje, përveç Lidhjes Demokratike besohet se mund të llogarisë që koalicionin paszgjedhor ta ndërtojë edhe me komunitetet joshumicë.