Kryeministri britanik Boris Johnson jep dorëheqje

Më 29 qershor, deputeti Chris Pincher shkoi në një klub në Londër. Me fjalët e tij, “kishte pirë shumë” dhe e “turpëroi veten”.

Ai u akuzua se kishte prekur dy burra, që çoi në nxitjen e deklarimeve të tjera, disa prej të cilave datonin qysh më herët. Nisi një zinxhir ngjarjesh që përfundon me rënien e kryeministrit.

Fillimisht, nga kabineti thanë se Johnsoni s’ka njohuri për raportimet e mëhershme ndaj Pincherit. Ministrat i dolën në përkrahje – edhe pse më vonë doli se s’ishte e vërtetë.

Më 4 korrik, BBC raportoi se Johnsoni kishte qenë në dijeni të ankesave zyrtare. Të nesërmen, një ish-zyrtar tha se kryeministri ka qenë në dijeni për ankesën.

Johnsoni e pranoi se i ishte thënë më 2019 dhe kërkoi falje që e caktoi Pincherin si zyrtar administrativ që siguron se anëtarët e partisë votojnë sipas dëshirës së lidershipit të partisë.

Ndeja në pandemi

Në prill sivjet, kryeministri Johnson ishte gjobitur për thyerjen e rregullave kufizuese, pasi organizoi një ndejë për ditëlindjen e vet në qershor të 2020-s sa vendi ishte nën masa kufizuese ndaj COVID-19.

Ai më pas kërkoi falje edhe që solli ndejën në rezidencën e kryeministrit.

Po ashtu, Policia shpërndau 126 gjoba për 83 njerëz që thyen rregullat në rrugët e rezidencave të krerëve.

Dhe një raport tjetër zyrtar përshkroi se ka pasur një seri të ngjarjeve të organizuara nga stafi politik që theu rregullat e izolimit.

Kriza jetësore – rritja e taksave

Inflacioni ka shënuar rritje drastike më 2022, duke prekur shkallë aktuale tash në 9.1 për qind.

Shumë nga arsyet ishin jashtë kontrollit të Boris Johnsonit. Pushtimi rus i Ukrainës, për shembull, çoi në shtrenjtim të karburanteve e produkteve ushqimore.

Qeveria ndërmori disa hapa – duke ulur çmimet e karburanteve – por edhe rriti taksat në prill.

Rritja e taksave u arsyetua me pagesën për kujdesin shëndetësor dhe social.

“Në mes të krizës më të keqe për jetë në disa dekada, Qeveria zgjodhi të rrisë taksat për punëtorët”, ka thënë lideri i Laburistëve, Sir Keir Starmer, në prill.

Përplasja për Owen Patersonin

Në tetor të 2021-s, një komitet në Dhomën e ulët të Parlamentit rekomandoi suspendim 30 ditor për atëkohë deputetin e Konservatorëve Owen Paterson.

Komisioni u shpreh se ai theu rregullat e lobimit, duke u përpjekur për t’i sjellë përfitime kompanive që e kanë paguar.

Por Konservatorët – të udhëhequr nga kryeministri – votuan për ndërprerjen e suspendimit, dhe vendosën një komitet të ri për të përcjellë hetimet.

Pas përplasjeve, Patersoni përfundoi me dorëheqje. Më vonë, Johnsoni pranoi se ka dështuar në zgjidhjen e rastit.

Mungesë përqendrimi e idesh

Boris Johnsoni fitoi shumicën pasi kreu me sukses daljen nga Bashkimi Evropian. Por që nga ajo kohë, kritikët e kanë akuzuar për mungesë përqendrimi e idesh në udhëheqje.

Ish-këshilltari i tij, Dominic Cummings, në vazhdimësi e ka akuzuar për humbje të kontrollit.

Të tjerët kanë vënë në pikëpyetje filozofinë e liderit, ose edhe nëse ka një të tillë. Në qershor, deputeti i Konservatorëve, Jeremy Hunt, akuzoi Johnsonin për mungesë “integriteti, kompetence e vizionit”.

Hunt u shpreh me këto fjalë pak para votimit të votëbesimit, të cilin Johnsoni e fitoi.

Por akuzat u shtuan më vonë.

Tash deklaratat e deputetëve pritet të qetësohen. Kryeministri është në largim.