Prej dy javësh, komisionet parlamentare në Kuvendin e Shqipërisë nuk ia dolën të zhvillojnë një debat për buxhetin e vitit të ardhshëm.
Protesta e opozitës dhe veprimet bllokuese të saj, bënë që mbledhjet ku qeveria duhet të jepte llogari se si do t’i shpenzojë taksat, të kalojnë online, mbledhje të cilat pakica parlamentare i bojkotoi.
Këtë të hënë është momenti që paketa fiskale të diskutohet dhe miratohet në parim, në seancën plenare.
Këto mbledhje zakonisht kanë qenë maratonë dhe debatet kanë vijuar gati dy ditë. Por nuk pritet të jetë kjo seanca e sotme.
Sali Berisha dhe grupimi që e mbështet kanë deklaruar se do ta ashpërsojnë edhe më tej reagimin dhe nuk do ta lejojnë Kuvendin të punojë.
Zor se mund të zbulohet çfarë mund të jetë më shumë se grumbulli i karrigeve të deputetëve mbi foltore, flakadanëve, tymuesve dhe grushtave mbi kundërshtarët. Në kushtet e një reagimi të paparashikuar, garda e republikës ka marrë masa për të garantuar sigurinë fizike të deputetëve dhe për të mos lejuar përplasjen mes tyre, raporton abcnews.al.
Gazment Bardhi publikoi një foto të shtunën, ku oficerët e Gardës janë duke bërë një testim në sallën plenare, plan që do ta zbatojnë sot.
