Chatboti kinez AI, DeepSeek, shkakton rrëmujë në treg

Aksionet në firmat më të mëdha të teknologjisë në SHBA kanë rënë dukshëm në vlerë pas shfaqjes së papritur të një chatboti me kosto të ulët të krijuar nga një firmë kineze e inteligjencës artificiale (AI), raporton “BBC”.

Aplikacioni DeepSeek, që u lansua javën e kaluar, ka kaluar rivalët duke përfshirë edhe ChatGPT, për t’u bërë aplikacioni falas që është shkarkuar më së shumti në SHBA.

Aksionet në firmat e teknologjisë me seli në SHBA që lidhen me AI, si Nvidia, Microsoft dhe Meta, kanë rënë të hënën.

Thuhet se chatboti kinez u zhvillua me një kosto dukshëm më të ulët dhe ka ngritur pyetje lidhur me dominimin e SHBA-së në AI dhe shkallën e investimeve që firmat amerikane po planifikojnë në këtë fushë.

Ky chatbot ka një model me burim të hapur DeepSeek-V3, për të cilin ekspertët thanë se e kanë zhvilluar për më pak se 6 milionë dollarë, dukshëm më pak se miliardat që kanë shpenzuar rivalët.
Por, ky pretendim është kundërshtuar nga të tjerët në fushën e AI-së.

Shkencëtarët thonë se përdorin teknologjinë ekzistuese dhe kodin me burim të hapur – softuer që mund të përdoret, modifikohet dhe shpërndahet nga kushdo pa pagesë.

Aplikacioni kinez ka filluar të hënën pasdite të ketë problemet e para.

“Për shkak të sulmeve të gjera qëllimkëqija në shërbimet e DeepSeek, regjistrimi mund të jetë i ngarkuar. Ju lutem prisni dhe provoni sërish. Përdoruesit e regjistruar mund të identifikohen normalisht. Faleminderit për mirëkuptimin dhe mbështetjen tuaj”, shkruan në faqen DeepSeek.

Shfaqja e DeepSeek vjen pasi SHBA-ja po e kufizon shitjen e teknologjisë së çipave të avancuar në Kinë, teknologji që fuqizon AI-në.